ԱՀ ավանդական քիք-բոքսինգի ֆեդերացիայի սան Հրաչյա Համբարձումյանը փետրվարի 22-ին կմասնակցի Երևանի Կարեն Դեմիրճյանի անվան մարզահամերգային համալիրում կայանալիք «MIX FIGHT 45» միջազգային մրցաշարին:
Արցախցի Հրաչյա Համբարձումյանը կմասնակցի «MIX FIGHT 45» միջազգային մրցաշարին
ՍՏԵՓԱՆԱԿԵՐՏ, 10 հունվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է մարզիկ Հրաչյա Համբարձումյանը՝ նշելով, որ ինքը մենամարտելու է չինացի մասնակցի հետ՝ քիք-բոքսինգ (K-1) մարզաձևում:
Մեր զրուցակիցը 2017 թվականից հանդիսանում է ԱՀ ավանդական քիք-բոքսինգի ֆեդերացիայի անդամ:
«Սպորտով սկսել եմ զբաղվել 7 տարեկանից: 9 տարեկան հասակում առաջին անգամ մասնակցել եմ Հայաստանի քիք-բոքսինգի առաջնությանը: Տարիների ընթացքում ունեցել եմ մի շարք ձեռքբերումներ: Մասնակցել եմ տարբեր միջազգային մրցաշարերի և գրանցել հաղթանակներ: 2017 թվականին ՀՀ սպորտի նախարարության կողմից արժանացել եմ «սպորտի վարպետ»-ի կոչման»,- ավելացրել է Հ. Համբարձումյանը Նա տեղեկացրել է, որ սկսած 2019 թվականի դեկտեմբերի 25-ից, մեկ ամսով մասնակցում է Ստեփանակերտում անցկացվող մարզական հավաքներին:
Մարզիկի խոսքով՝ արդեն երկրորդ անգամ է, ինչ պիտի մասնակցի «MIX FIGHT 45» մրցաշարին. առաջին անգամ մասնակցել է 2017 թվականին, Իսպանիայում և գրանցել հաղթանակ: «Պետք է նպատակս և ցանկությունս իրականություն դարձնեմ՝ դառնամ մրցաշարի հաղթող»,-ընդգծել է Հ. Համբարձումյանը:
Իսկ ԱՀ ավանդական քիք-բոքսինգի ֆեդերացիայի փոխնախագահ, գլխավոր մարզիչ Արմեն Ղահրամանյանն էլ շնորհակալություն է հայտնել կազմակերպության նախագահ Վարդան Մնացականյանին՝ Հ. Համբարձումյանին նման հնարավորություն ընձեռելու համար:
