ԱՀ գյուղատնտեսության նախարար Ժիրայր Միրզոյանն այսօր` հունվարի 13-ին, հանրապետության գյուղբաժնի ղեկավարների, գյուղատնտես-մասնագետների և ոլորտի պատասխանատուների մասնակցությամբ անց է կացրել աշխատանքային խորհրդակցություն՝ քննարկելու գյուղատնտեսության ոլորտում առաջացած մի շարք խնդիրներ, որոնք հիմնականում հետևանք են անբավարար բնակլիմայական պայմանների:
Ժիրայր Միրզոյանը հրավիրել է աշխատանքային խորհրդակցություն. քննարկվել են գյուղոլորտում երաշտի հետևանքով առաջացած խնդիրները
ՍՏԵՓԱՆԱԿԵՐՏ, 13 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ խորհրդակցությանը բացման խոսքով հանդես է եկել Ժ. Միրզոյանը:
Նրա խոսքով՝ արդեն տևական ժամանակ է, ինչ հանրապետությունում տեղումների լուրջ պակաս կա, որի հետևանքով ԱՀ գյուղատնտեսության նախարարության մասնագետներն արձանագրել են մեծ չափերով վնասված տարածքներ՝ հատկապես աշնանացան հացահատիկի:
«Բնակլիմայական պայմաններն ամբողջ աշխարհում էական վնասներ են հասցրել ոչ միայն գյուղատնտեսությանը՝ այլև բնապահպանությանը: Այնպիսի իրավիճակ է ստեղծվել դաշտավարության ոլորտում, որի պատճառով լուրջ որոշում կայացնելու խնդրի առաջ ենք կանգնած»,-մասնավորապես ասել է նախարարը:
Ժ. Միրզոյանը տեղեկացրել է, որ անցած երկու տարիներին ևս եղել է տեղումների անբավարար վիճակ, սակայն այս տարի իրավիճակն ավելի լուրջ է:
«Մենք երեկ արձանագրել ենք, որ «Խաչեն» ջրամբարում ընդհանրապես ջուր չկա. ջրամբարում ունենք ֆիլտրացիա, գոլորշիացում, բայց ջրի մուտք չկա: Եթե առաջիկա օրերին տեղումները չավելանան, այստեղ ունենալու ենք նաև բնապահպանական լուրջ խնդիր»,-ավելացրել է նախարարը:
ԱՀ գյուղատնտեսության փոխնախարար Վիլեն Ավետիսյանն իր հերթին ներկայացրել է վնասված ցանքատարածքների առկա ընդհանուր իրավիճակը:
Նա ասել է, որ 2020 թվականին բերքի տակ նախատեսված է 75 հազար հա տարածք, որը, նախորդ տարվա համեմատ, 9 %-ով կամ 6000 հա-ով ավել է:
«Նշված տարածքների վրա կատարվել է 67 հազար 512 հա աշնանացան, որից 31 հազար 254 հա-ը ցորեն է, իսկ 36 հազար 258 հա-ը՝ գարի: Նախորդ տարվա համեմատ աշնանացանի տարածքները ևս ավելացվել են շուրջ 5 %-ով: Երաշտի պատճառով տարբեր աստիճանի վնասված տարածքները, նախնական տվյալներով, կազմում են 14 հազար 445 հա: Վնասատուներով վարակված տարածքները հանրապետությունում կազմում են 5120 հա: Շուրջ 2000 հա-ի վրա իրականացվել է վնասատուների դեմ պայքար. տարածված են և հիմնականում զարգանում են հացազգի ճանճերը, մկնանմաները քիչ են»,-մանրամասնել է Վ. Ավետիսյանը:
Այնուհետև հանրապետության գյուղբաժինների ղեկավարները հակիրճ ներկայացրել են իրենց շրջանների գյուղատնտեսության ոլորտի իրավիճակը և հայտնել կարծիքներ ու առաջարկություններ:
Խորհրդակցությանը ներկա բուսաբան, դոկտոր-պրոֆեսոր Արտակ Գուլյանն ասել է, որ անջրդի պայմաններում, հատկապես չորային ժամանակներում, կրկնավարներ ընդհանրապես չի կարելի իրականացնել: Միջատների դեմ ոչ մի սրսկում չպետք է կատարել, լավագույն միջոցը ցանքաշրջանառությունն է:
«Ստեղծված իրավիճակում ցանքսերը փրկելու համար անհրաժեշտ է առաջին հերթին փոքր ատամնավոր փոցխերով հողը փոցխել, ինչպես նաև՝ ազոտական սնուցում տալ: Արմատապես պետք է վերանայել հողի՝ մշակման նախապատրաստման հարցը: Աշնանացանի ամառային բերքահավաքից հետո հողն անպայման մակերեսորեն պետք է մշակվի, որից հետո ստեղծել պայմաններ, որպեսզի աշնանացանը պահանջվող ժամկետներում կատարվի»,- ընդգծել է Ա. Գուլյանը:
Խորհրդակցության վերջում Ժիրայր Միրզոյանը գյուղբաժինների ղեկավարներին հանձնարարել է, որ մեկ շաբաթվա ընթացքում հանդիպեն հողօգտագործողներին և քննարկեն առկա իրավիճակը, իրականացնեն դիտարկումներ, որից հետո ԱՀ գյուղատնտեսության նախարարությունում կկազմակերպեն քննարկում և վերջնական որորշումներ կկայացնեն: