Այս տարի Սուրբ Սարգիս զորավարի տոնը, որը հայության մեջ համարվում է որպես երիտասարդության և սիրո օրհնության տոն, կնշվի փետրվարի 8-ին:
Երիտասարդների և սիրո բարեխոս Սուրբ Սարգսի տոնն այս տարի կնշվի փետրվարի 8-ին
ՍՏԵՓԱՆԱԿԵՐՏ, 16 հունվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի քաղաքապետարանի մշակույթի, երիտասարդության հարցերի և զբոսաշրջության բաժնի պետ Կարինա Հարությունյանը:
Նրա խոսքով՝ Ստեփանակերտի քաղաքապետարանի նախաձեռնությամբ մայրաքաղաքի Ստեփան Շահումյանի անվան օղակաձև պուրակում փետրվարի 8-ին՝ ժամը 15:00-ին տեղի կունենա տոնական միջոցառում՝ նվիրված Սուրբ Սարգսի տոնին: «Միջոցառմանը կմատուցվի օրհնության կարգ, որին կհաջորդեն հայկական ավանդական երգն ու պարը, խաղիկները: Երիտասարդներին կբաժանվեն աղի բլիթներ ու քաղցրավենիք: Կանցկացվի սիրո յուրահատուկ խոստովանության մրցույթ: Սպասվում են նաև հետաքրքիր այլ անակնկալներ:
Նման միջոցառումների շնորհիվ մեր երիտասարդությունը ավելի է մոտ կանգնում մեր ազգային դիմագիծը ներկայացնող տոներին: Չնայած ոմանք նշում են Վալենտինի տոնը, բայց այն ոչ մի կապ չունի հայ եկեղեցու տոների հետ: Յուրաքանչյուր հայ երիտասարդ պետք է ճանաչի իր եկեղեցական սրբերին, հետևի հայկական առաքելական եկեղեցու տոնացույցին»,-մասնավորապես ասել է նա:
