Այսօր՝ հունվարի 20-ին, դատական համակարգի աշխատողի օրվան նվիրված՝ կայացել է հանդիսավոր միջոցառում:
Այսօր դատական համակարգի աշխատողի օրն է. հանրապետության նախագահը պարգևատրել է ոլորտի մի խումբ աշխատակիցների
ՍՏԵՓԱՆԱԿԵՐՏ, 20 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ միջոցառմանը ԱՀ նախագահ Բակո Սահակյանը իշխանությունների և անձամբ իր անունից շնորհավորել է դատական համակարգի աշխատողների, վետերանների տոնը:
Նա ասել է, որ ժողովրդավարական պետության կայացման, իշխանության թեւերի միջեւ հավասարակշռվածության ապահովման համար չափազանց կարեւոր է օրենքի տառին ևոգուն համահունչ, լիարժեք գործող, արհեստավարժ դատական համակարգը:
«Դատական համակարգը երկրում վճռորոշ դեր ունի արդարադատության իրականացման, իրավունքի գերակայության և մարդու իրավունքների պաշտպանության գործում: Ժողովրդավարական պետության կայացման, իշխանության թևերի միջև հավասարակշռվածության ապահովման համար չափազանց կարևոր է ունենալ, որ օրենքի տառին և ոգուն համահունչ, լիարժեք գործող, արհեստավարժ համակարգ: Դատարանների անկախության և դատավորների սոցիալական խնդիրների լուծման ուղղությամբ տարիներ շարունակ պետության կողմից իրականացվել է նպատակասլաց քաղաքականություն, որի դրական արդյունքները նկատելի են: Համակարգում նվազագույնին են հասցվել կոռուպցիոն ռիսկերը, անցյալում են մնացել դատական ակտերի ընդունման ժամանակ տարբեր բնույթի բացասական դրսևորումները: Միևնյուն ժամանակ անհրաժեշտ է լուրջ ուշադրություն դարձնել համակարգում արհեստավարժության մակարդակի շարունակական բարձրացման հետ կապված հարցերի լուծմանը, ինչն էլ իր հերթին կնպաստի առավել որակյալ դատական ակտերի ընդունմանը և արդարադատության լիարժեք իրականացմանը»,- մասնավորապես ասել է Բ. Սահակյանը:ԱՀ Գերագույն դատարանի նախագահ Նարինե Նարիմանյանն ի սրտե շնորհավորել է դատական համակարգի բոլոր աշխատողներին՝ մաղթելով հաջողություն, նոր ու կայուն ձեռքբերումներ մարդու և քաղաքացու իրավունքների և ազատությունների ապահովման և Արցախի պետականության ամրապնդմանն ուղղված բարդ ու պատասխանատու գործում:
«Իրավական պետության կառուցման ճանապարհին դատական իշխանությունն իր հաստատուն և առաջանցիկ քայլերով շարունակում է իրականացնել Սահմանադրությամբ իրեն վերապահված լիազորությունը՝ արդարադատությունը: Վերջին տարիներին դատական գործերի կտրուկ աճ է գրանցվել, ինչը վկայում է հասարակության կողմից դատարանի հանդեպ վստահության մասին: Դատական իշխանության հեղինակությունը բարձր պահելու միակ միջոցը մեր կողմից անկողմնակալ և օրենքի տարրին համապատասխան դատական ակտերի կայացումն է, ինչն իր հերթին պահանջում է մասնագիտական ունակությունների շարունակական կատարելագործում: Դատական համակարգի որոշումներն օրեցօր նոր իրավամտածողության ձևավորման հիմք են դառնում, և արտացոլում են ոչ միայն հայրենական իրավագիտության ձեռքբերումները, այլ նաև՝ Մարդու իրավունքների եվրոպական դատարանի որոշումներում ամրագրված սկզբունքները»,-մասնավորապես ասել է Ն. Նարիմանյանը:Ելույթներով հանդես են եկել նաև ԱՀ Քննչական կոմիտեի նախագահ Իգոր Գրիգորյանը, ԱՀ Արդարադատության նախարար Արարատ Դանիելյանը, ովքեր բարձր են գնահատել դատական համակարգի գործունեությունը:
Միջոցառմանն ԱՀ նախագահի հրամանագրով ակտիվ ու բարեխիղճ գործունեության համար «Մխիթար Գոշ» մեդալով պարգևատրվել են ԱՀ վերաքննիչ դատարանի դատավոր Լիլյա Ավանեսյանը և Գերագույն դատարանի դատավոր Հասմիկ Խաչատրյանը: Նախագահի կարգադրություններով դատական համակարգի աշխատողի օրվա կապակցությամբ արժեքավոր նվերների և դասային աստիճանի են արժանացել համակարգի մի խումբ աշխատակիցներ:
Նշենք, որ տոն օրվա կապակցությամբ դատարանների նախագահների խորհրդի նախագահի և դատական դեպարտամենտի ղեկավարի հրամաններով համակարգի 49 աշխատողներ խրախուսվել են դրամական պարգևներով, 11 դատական ծառայողի շնորհվել է առավելագույն դասային աստիճան, 7 հոգու հայտարարվել է շնորհակալություն:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -38-:
