ԱՀ Կենտրոնական ընտրական հանձնաժողովն այսօր կայացած նիստում հաստատել է ԱՀ Նախագահի և Ազգային ժողովի 2020 թ.-ի մարտի 31-ի հերթական ընտրությունների նախապատրաստման և անցկացման հիմնական միջոցառումների ժամանակացույցը:
Ինչպես կկազմակերպվեն համապետական ընտրությունները. ԿԸՀ-ն նիստ է հրավիրել
ՍՏԵՓԱՆԱԿԵՐՏ, 21 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ներկայացնելով հիմնական միջոցառումների ժամանակացույցը՝ ԱՀ Կենտրոնական ընտրական հանձնաժողովի նախագահ Սրբուհի Արզումանյանն ասել է, որ համապետական նշանակության երկու՝ ԱՀ Նախագահի և Ազգային ժողովի ընտրությունների նախապատրաստական փուլը ենթադրում է բավական ծավալուն աշխատանք: Այդ առումով անելիքներ կան թե՛ ընտրական հանձնաժողովների, և թե՛ ընտրության մասնակից թեկնածուների ու քաղաքական ուժերի կողմից:
ԱՀ նախագահի և Ազգային ժողովի 2020 թվականի մարտի 31-ի հերթական ընտրությունների նախապատրաստման և անցկացման հիմնական միջոցառումների ժամանակացույցը, ընդհանուր առմամբ, ընդգրկում է շուրջ 84 հիմնական գործողությունների կատարում (միջոցառումների անցկացում):
Ս. Արզումանյանը նշել է, որ, այսօրվանից սկսած, թեկնածուները, կուսակցությունների ընտրական ցուցակներում ընդգրկված թեկնածուները իրավունք կունենան ԱՀ Ոստիկանությունից ստանալու տեղեկանք՝ իրենց քաղաքացիության և կեցության ցենզի վերաբերյալ: Խոսքը վերաբերում է երկրի նախագահի թեկնածուների դեպքում 10 տարի քաղաքացի հանդիսանալու և վերջին 10 տարում Արցախում մշտապես բնակվելու, իսկ պատգամավորի թեկնածուների դեպքում՝ 5 տարի քաղաքացի հանդիսանալու մասին տեղեկանքներին:
«Ընտրությունների մեկնարկը ընտրությունների մասնակիցներին իրավունք է վերապահում բացել նախընտրական շտաբեր, որոնք էլ հենց այսօրվանից կարող են բացել: Նախընտրական քարոզչության ժամանակահատվածում Արցախի հանրային ռադիոյով և հանրային հեռուստատեսությամբ վճարովի եթերաժամի 1 րոպեի գինը, ինչպես նաև հանրապետության նախագահի թեկնածուներին, Ազգային ժողովի ընտրություններին մասնակցող կուսակցություններին, կուսակցությունների դաշինքներին եթերաժամ տրամադրող վերգետնյա հեռարձակում իրականացնող մյուս ռադիոընկերությունների և հեռուստաընկերությունների վճարովի եթերաժամի 1 րոպեի գինը պետք է հրապարակվի ընտրությունների նշանակումից ոչ ուշ, քան 10 օր հետո: Այսինքն՝ մինչև հունվարի 30-ը պետք է վճարովի եթերաժամի գինը հրապարակվի»,- ավելացրել է ԿԸՀ Նախագահը:
Նրա խոսքով՝ համայնքների ղեկավարներին շրջանների վարչակազմի ղեկավարների միջոցով Ստեփանակերտի քաղաքապետի կողմից պետք է թեկնածուներին, կուսակցություններին անվճար հիմունքներով տրամադրվող դահլիճների և այլ շինությունների ցանկ կազմվի, և այն կներկայացվի ԿԸՀ-ին: Կայքում հասանելի կլինի բոլոր այն դահլիճների, շինությունների ցանկը, որտեղ ընտրության մասնակից թեկնածուները և կուսակցությունները կարող են հանդիպումներ կազմակերպել: Ցանկի տրամադրումը պետք է ներկայացվի մինչև փետրվարի 2-ը:
Համայնքի տարածքում քարոզչական պաստառներ, քարոզչական տպագիր և այլ բնույթի նյութեր փակցնելու համար անվճար տեղեր առանձնացնելու մասին որոշում պետք է ընդունվի համայնքի ղեկավարների կողմից մինչև փետրվարի 16-ը:
Ընտրացուցակները տեղամասային կենտրոնում բոլորի համար տեսանելի տեղում կփակցվեն քվեարկության օրվանից 40 օր առաջ: Ցուցակները պետք է հասանելի լինեն մինչև փետրվարի 20-ը: ԿԸՀ պաշտոնական կայքում ընտրողների ռեգիստրը թարմացրած տարբերակով արդեն իսկ հասանելի է: Մի քանի օրից ԱՀ Ոստիկանության կողմից տրամադրված համապատասխան տեղեկատվության հիման վրա այն կրկին կթարմացվի:
Ս. Արզումանյանը տեղեկացրել է, որ ընտրությունների քվեարկության նախնական արդյունքներն ամփոփվում, արձանագրությամբ վավերացվում, Արցախի հանրային ռադիոյով և հանրային հեռուստատեսության ուղիղ եթերով պաշտոնապաես հրապարակվում են քվեարկության ավարտից ոչ ուշ, քան 24 ժամ հետո: Համապետական ընտրությունների վերջնական արդյունքները կամփոփի ԿԸՀ-ն՝ տեղամասերից ստացված տեղեկությունների հիման վրա: Ընտրության արդյունքները կամփոփվեն և ընտրությունների արդյունքների վերաբերյալ որոշում կընդունվի քվեարկության օրվանից հետո 7-րդ օրը՝ ապրիլի 7-ին: Ս. Արզումանյանը նշել է, որ, բնականաբար, օրենսդիր մարմինը երկրորդ փուլի հավանականություն նախատեսում է: Անհրաժեշտության դեպքում՝ կսահմանվի առանձին ժամանակացույց:
Ի դեպ, առաջին անգամ կիրականացվի քվեարկության մասնակցած ընտրողների ցուցակների սկանավորում: Գործընթացը կիրականացվի ընտրությունների ավարտից հետո: Սկանավորված ցուցակները հասանելի կլինեն տարածքային ընտրական հանձնաժողովներում:
ԿԸՀ նախագահը տեղեկացրել է, որ առաջիկայում նախատեսվում են մասնագիտական դասընթացներ: Դրանց մասնակցելու համար հայտերի ընդունումը սկսվել է և 1-շաբաթյա ժամկետում պետք է նրանք, ովքեր ցանկություն ունեն ընդգրկվելու տեղամասային ընտրական հանձնաժողովների կազմում, ներկայացնեն հայտերը, որից հետո մասնակցեն մասնագիտական դասընթացների, ստանան համապատասխան վկայականներ: Մասնագիտական դասընթացները կկազմակեպվեն փետրվար ամսվա ընթացքում:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -35-:
