Արցախի Հանրապետության արդարադատության նախարարության և նրա ստորաբաժանումների կողմից 2019 թվականին աշխատանքներ են տարվել համակարգի առջև դրված խնդիրների ու գործառույթների իրականացման ուղղությամբ: Շարունակական բնույթ են կրել ԱՀ օրենսդրության կատարելագործման, դատաիրավական համակարգի և իրավակիրառական պրակտիկայի բարեփոխման ուղղությամբ տարվող աշխատանքները:
2019 թ.-ին արդարադատության նախարարությունում մուտքագրվել են 8081 դիմում-գրություններ. Արարատ Դանիելյանն ամփոփել է անցած տարին
ՍՏԵՓԱՆԱԿԵՐՏ, 23 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ամփոփիչ մամուլի ասուլիսի ժամանակ ասել է ԱՀ արդարադատության նախարար Արարատ Դանիելյանը:
Նրա խոսքով՝ նախարարության առջև դրված կարևորագույն խնդիրներից է հանդիսացել մարդու իրավունքների և ազատությունների արդյունավետ պաշտպանության իրականացումը, բնակչությանը մատուցվող ծառայությունների որակի բարձրացումը և համակարգի ստորաբաժանումների գործունեության բարելավումը: Միջոցներ են ձեռնարկվել համակարգի սոցիալ-տնտեսական զարգացման, գործունեության բարեփոխման և նյութատեխնիկական բազայի ընդլայնման ուղղությամբ: Գործուն և համակարգային բնույթ է կրել համակարգի ստորաբաժանումների գործունեության նկատմամբ տարվող հսկողությունը, դրա կազմակերպչական և մեթոդական կառավարումը, պրակտիկ օգնության ցուցաբերումն ու ստուգումների իրականացումը, վերհանված թերությունների և բացթողումների քննարկումն ու դրանց վերացման համար համապատասխան միջոցների կիրառումը: Անցած տարում նախարարն ընդունել է 93 քաղաքացիների: Բացի դրանից, այցելել է Ասկերանի, Մարտակերտի, Մարտունու, Հադրութի, Շահումյանի, Շուշիի, Քաշաթաղի շրջանների և Ստեփանակերտի տարածքային ստորաբաժանումներ, հանդիպել է համապատասխան ստորաբաժանումների ղեկավարներին, ծանոթացել առկա խնդիրներին ու տվել անհրաժեշտ ցուցումներ: Նախագահին առընթեր սահմանադրական բարեփոխումների համակարգման խորհրդի, Կառավարության, ԱԺ պետական-իրավական հարցերի և պաշտպանության, անվտանգության, օրինապահպանության մշտական հանձնաժողովների նիստերում և ԱԺ քննարկմանն է ներկայացրել 84 օրենքների և կառավարության 17 որոշումների նախագծեր:«Նախարարությունում մուտքագրվել են 8081 (7174) դիմում-գրություններ, որոնցից 4403 (3981) պետական մարմինների և նախարարության տարածքային ստորաբաժանումների, 3592 (3116) աշխատակազմի աշխատակիցների (կազմակերպչական բնույթի), հասարակական կազմակերպությունների, անհատ ձեռնարկատերերի, իսկ 86 (77) քաղաքացիների կողմից: Առօրյա բնույթ են կրել քաղաքացիների ընդունելությունները, նրանց իրավական օգնություն ցուցաբերելու աշխատանքները»,- նշել է Ա. Դանիելյանը:
Մամուլի ասուլիսին արդարադատության նախարարը պատասխանել է լրագրողների կողմից բարձրացված մի շարք հարցերի:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -36-:
