Քաղաքացիական կացության ակտերի գրանցման բաժնում 2019 թվականին գրանցվել են 2131 ծննդյան ակտային գրանցումներ՝ նախորդ տարվա 2336-ի փոխարեն:
2019 թ.-ին Արցախում գրանցվել է 2131 ծնունդ
ՍՏԵՓԱՆԱԿԵՐՏ, 23 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ամփոփիչ մամուլի ասուլիսի ժամանակ ասել է ԱՀ արդարադատության նախարար Արարատ Դանիելյանը:
Անդրադառնալով վիճակագրական տվյալների վերլուծությանը՝ նախարարը նշել է, որ 2131 երեխաներից 685-ը առաջնեկ են, 672-ը՝ երկրորդ երեխա, 440-ը՝ երրորդ, 169-ը՝ չորրորդ, 90-ը՝ հինգերորդ, 38-ը՝ վեցերորդ, 15-ը՝ յոթերորդ և 10-ը՝ ութերորդ ու բարձր: Նշված ծնունդներից կենդանածին են 2119-ը: «Վիճակագրական տվյալների վերլուծությունից երևում է, որ ծննդաբերող մայրերի միջին տարիքը կազմում է 27.5 տարին:
Կազմվել է թվով 21 երկվորյակ երեխաների ծննդյան ակտային գրանցում: Ընդհանուր առմամբ, 2018 թ.-ի համեմատությամբ, 2019 թ.-ի ծննդյան ակտային գրանցումների թիվը նվազել է 205-ով: Ծննդյան ակտային գրանցումների ուսումնասիրությունից երևում է, որ ամենատարածված տղա երեխաների անուններն են Դավիթ, Ալեքս, Մարկ, Աշոտ անունները, իսկ աղջիկ երեխաների համար` Աննա, Նարե, Մարիամ, Մարիա անունները»,- մանրամասնել է Ա. Դանիելյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -44-:
