2019 թվականին ԱՀ առողջապահության նախարարության ենթակա բուժհիմնարկների միջոցով հանրապետության բնակչությանը անվճար տրամադրվել է 199 մլն 342 հազար 773 դրամ գումարի դեղորայք, որից կենտրոնացված կարգով դեղերի ձեռքբերման համար՝ 138 մլն 266 հազար 673 ՀՀ դրամի չափով, իսկ բուժհիմնարկների բյուջեի միջոցների հաշվին՝ ավելի քան 61 մլն գումարի չափով։
Անցած տարի Հայաստանի Հանրապետություն է ուղեգրվել 1100 հիվանդ. Արայիկ Բաղրյան
ՍՏԵՓԱՆԱԿԵՐՏ, 24 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր՝ հունվարի 24-ին կայացած մամլո ասուլիսի ժամանակ ասել է ԱՀ առողջապահության նախարար Արայիկ Բաղրյանը:
Նա տեղեկացրել է, որ պետական բյուջեից հիվանդների բուժման ծախսերի փոխհատուցման նպատակով հատկացված 227 մլն դրամ գումարից 199 մլն 701 հազար 110 դրամ, համաձայն ԱՀ կառավարության 2013 թվականի հունվարի 29-ի թիվ 23-Ն որոշման, առողջապահության նախարարության կողմից հատկացվել է որոշ հիվանդություններով տառապող 282 քաղաքացիների` բուժման ծախսերի փոխհատուցման նպատակով, 6 մլն 374 հազար 500 դրամը՝ 480 քաղաքացիների այլ քաղաքներում բուժման մեկնելու ճանապարհածախսի փոխհատուցման համար և 12 մլն 902 հազար 665 դրամ՝ 91 հիվանդի սանիտարական տրանսպորտով տեղափոխման համար։
«Անցած տարի բուժման նպատակով Հայաստանի Հանրապետություն է ուղեգրվել 1100 հիվանդ, որը կազմում է ընդհանուր բնակչության 0,6%-ը: Ուղեգրվել են, հիմնականում, չարորակ նորագոյացություններով հիվանդները՝ ճառագայթային բուժման նպատակով, էպիլեպսիա, բրոնխիալ ասթմա, արյան ու միզասեռական համակարգի հիվանդություններով տառապող հիվանդները բուժօգնության նպատակով՝ ինչպես նաև ոսկրածուծի բիոպսիա հետազոտության՝ ախտորոշման ճշտման նպատակով։ Ուղեգրված հիվանդների 48%-ը կազմում են 0-18 տարեկան երեխաները»,-ավելացրել է նախարարը և հավելոլ, որ հատուկ ուշադրություն է դարձվել դիսպանսերային ծառայության կազմակերպմանը` սոցիալական հատուկ նշանակության հիվանդների հայտնաբերման ուղղությամբ (հակատուբերկուլյոզային, ուռուցքաբանական, հոգեթմրաբանական, մաշկավեներաբանական, ոչ վարակիչ հիվանդություններ և այլն):