ՍՏԵՓԱՆԱԿԵՐՏ, 29 հունվարի, ԱՐՑԱԽՊՐԵՍ։ «Արցախպրես»-ի  թղթակցի  հաղորդմամբ՝    այս  մասին    այսօր  կայացած       մամուլի  ասուլիսին  ասել  է  ԱՀ  ֆինանսների  նախարար   Արթուր  Հարությունյանը:

Նրա  խոսքով՝   ըստ կանխատեսումների՝ 2019 թվականի համախառն ներքին արդյունքը   կկազմի  341  մլրդ դրամ, որը կապահովի շուրջ 9.1 %  տնտեսական աճ՝ 0.7 %  դեֆլյատորի  պայմաններում: 

«Նման աճի տեմպի կանխատեսման համար հիմք է հանդիսացել նյութական արտադրության ճյուղերում ստեղծված ավելացված արժեքը: Նյութական արտադրության հիմնական ոլորտներում սպասվող ցուցանիշները հետևյալն են.  արդյունաբերական արտադրանքի ծավալը կկազմի ավելի քան 164   մլրդ դրամ` նախորդ տարվա համեմատ իրական արտահայտությամբ աճելով մոտ 32 %-ով, շինարարության ծավալը կկազմի շուրջ 61 մլրդ դրամ` ապահովելով աճ 16.5 %-ի չափով, գյուղատնտեսության արտադրանքի  ծավալը կկազմի ավելի քան 77   մլրդ դրամ՝ նախորդ տարվա համեմատ աճելով մոտ 3 տոկոսային կետով: 2019 թվականի ընթացքում միջինացված գնաճը կազմել է   0.7 % (11 ամսվա գնաճ` 0.8 %՝  նախորդ տարվա 1,8  %-ի դիմաց):  2019 թվականի պետական բյուջեի սեփական եկամուտները կազմել են 60 մլրդ 141.6 մլն դրամ` ապահովելով պլանային առաջադրանքի 100.8  %   կամ պլանավորված ցուցանիշից ավել 461.5 մլն դրամով: 2018 թվականի համեմատ ավել է հավաքագրվել ավելի քան 5 մլրդ 859.0 մլն դրամ:  2019 թվականին հարկային եկամուտների և պետական տուրքի գծով բյուջե է մուտքագրվել 59 մլրդ 231.8 մլն դրամ՝ պլանավորված 58 մլրդ 794.7 մլն դրամ ցուցանիշը գերազանցելով 0.7 %-ով կամ 437.1 մլն դրամով: Նախորդ տարվա համեմատ հարկային եկամուտների և պետական տուրքի գծով մուտքերն աճել են 10.7 %-ով  կամ ավել 5 մլրդ 709.3 մլն դրամով, որից 308.9 մլն դրամը ապահովվել է «Բեյզ Մեթըլս» ՓԲԸ հաշվին, իսկ մնացած 5 մլրդ 400  մլն դրամն ապահովվել է տնտեսության այլ ճյուղերում գործունեություն իրականացնող հարկ վճարողների հաշվին, որը աննախադեպ ցուցանիշ է մեր երկրի համար: Այլ ճյուղերի հաշվին ավել հավաքագրման այսպիսի ցուցանիշ երբևիցե չի արձանագրվել, ինչը վերջին տարիներին  տնտեսության դիվերսիֆիկացման ուղղությամբ կառավարության կողմից տարվող հետևողական աշխատանքների, տնտեսական աճի և հարկային մարմնի կողմից իրականացվող հետևողական վարչարարության արդյունք է: Հավաքագրված հարկային եկամուտների և պետական տուրքի գումարների մոտ 79 տոկոսը ապահովվել է խոշոր հարկ վճարողների հաշվին»,-մանրամասնել է   նախարարը: 

Նրա  խոսքով՝  Հայաստանի Հանրապետությունից ստացված բյուջետային վարկը կազմել  է  57 մլրդ 847    մլն դրամ` 2018 թվականի 51 մլրդ 428.2 մլն դրամի դիմաց: 

Ա. Հարությունյանն  ասել է, որ   2019  թվականի պետական բյուջեի փաստացի  ծախսերը կազմել են 113 մլրդ 330.8 մլն դրամ` ապահովելով նախատեսված ծրագրի 97.3 %-ը՝ 2018 թվականի 97.1 %-ի դիմաց: Ծախսերի աճը 2018 թվականի նկատմամբ կազմել է 8.7 մլրդ դրամ:

«2019 թվականի պետական բյուջեն կատարվել է առանց ծախսերի գծով ընթացիկ պարտքերի կուտակման: Պետական բյուջեի կատարման ընթացքում մեզ հաջողվել է ամբողջ ծավալով ֆինանսավորել աշխատավարձերը, թոշակները, նպաստներն ու  սոցիալական բնույթի այլ ծախսերը, ինչպես նաև կրթության, առողջապահության, մշակույթի և տնտեսական ոլորտի բոլոր ծրագրերը»,-նշել  է   նախարարը:

Ասուլիսի  վերջում   ԱՀ  ֆինանսների  նախարարը  պատասխանել է  լրագրողների   հարցերին: