2019 թվականին հարկային մարմնի առաջնահերթությունների շարքում էր հարկային օրենսդրության կատարելագործումը:
Հարկային օրենսգրքի փոփոխությունները կդրվեն հանրային քննարկման
ՍՏԵՓԱՆԱԿԵՐՏ, 29 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր կայացած մամուլի ասուլիսին ասել է ԱՀ ֆինանսների նախարար Արթուր Հարությունյանը՝ նշելով, որ այդ նպատակով մշակվել և Կառավարության ու Ազգային Ժողովի քննարկմանն են ներկայացվել օրենսդրական փոփոխությունների երկու փաթեթ:
Ըստ Ա. Հարությունյանի՝ օրենսդրական փոփոխությունների առաջին փաթեթով 2019 թվականի հուլիսի 1-ից ներդրվել է հարկային հաշիվների դուրս գրման էլեկտրոնային համակարգը, ինչի արդյունքում էապես կրճատվել են հարկ վճարողների կողմից դուրս գրվող հարկային հաշիվներում սխալներ կատարելու հավանականությունը, թղթային տարբերակով հարկային մարմին ներկայացվող տեղեկատվության ծավալը, ինչպես նաև օրենսդրական հիմքեր ստեղծվել հարկային հաշիվների շրջանառության նկատմամբ հարկային մարմնի կողմից հսկողական նոր գործիքակազմ կիրառելու համար:
«Օրենքի շրջանակներում 2019 թվականի հուլիսի 1-ից մինչև 2020 թվականի հունվարի 1-ը հարկ վճարողների կողմից էլեկտրոնային եղանակով դուրս են գրվել ավելի քան 200.000 հարկային հաշիվներ, որոնք անմիջականորեն արտացոլվել են հարկային մարմնի տեղեկատվական բազայում, և կատարվել համապատասխան մշակումներ: Օրենսդրական մյուս փաթեթով հանրապետությունում ներդրվել է կուտակային կենսաթոշակային համակարգը, որի նպատակն է պատշաճ կենսաթոշակ ապահովել կենսաթոշակառուների համար` կենսաթոշակային համակարգը դարձնելով ֆինանսապես կայուն և ապահովելով ուղղակի կապ անձի եկամուտների և կենսաթոշակի չափի միջև: Զուգահեռաբար մեկ տոկոսային կետով նվազեցվել է եկամտային հարկի դրույքաչափը` սահմանվելով 20 %: Օրենքի համաձայն` կուտակային հատկացումները ձևավորվում են մասնակցի կողմից կատարվող սոցիալական վճարներից, որը կազմում է իր ամսական եկամտի 2.5 %-ը, և պետական բյուջեից հատկացվող լրացուցիչ միջոցներից` 7.5 %-ի չափով: Գործընթացի շրջանակներում 2019 թվականի հուլիս-դեկտեմբեր ամիսների ընթացքում մշակվել են կուտակային բաղադրիչի շուրջ 22.000 մասնակիցների տվյալներ, և նրանց անհատական կենսաթոշակային հաշիվներին փոխանցվել 1 մլրդ 323.4 մլն դրամ կուտակային հատկացումներ, որից 333.9 մլն դրամը մասնակիցների կողմից վճարված սոցիալական վճարներն են, իսկ 989.5 մլն դրամը` Արցախի Հանրապետության պետական բյուջեից հատկացված միջոցները»,-ավելացրել է նախարարը:
Նա հավելել է, որ հաշվետու տարում մեկնարկել են Հարկային օրենսգրքի մշակման աշխատանքները: Այդ նպատակով համակարգում ձևավորվել է աշխատանքային խումբ, հարկ վճարողներից և այլ շահագրգիռ անձանցից հավաքագրվել են գործարար միջավայրի բարելավման մասով առաջարկություններ: Այս մասով առաջիկայում նախատեսվում են կազմակերպել հանրային լայն քննարկումներ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -35-:
