Ստեփանակերտի Մուրացանի անվան քաղաքային գրադարանի նախաձեռնությամբ այսօր՝ փետրվարի 11-ին, մայրաքաղաքի Կոմիտասի անվան երաժշտական դպրոցում կայացել է գրական-երաժշտական հուշ-ցերեկույթ՝ նվիրված նշանավոր հայ բանաստեղծ, հասարակական-քաղաքական գործիչ Վահան Տերյանի ծննդյան 135 և մահվան 100-ամյակին:
Մուրացանի անվան քաղաքային գրադարանը հերթական գրական ցերեկույթն է կազմակերպել
ՍՏԵՓԱՆԱԿԵՐՏ, 11 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Մուրացանի անվան քաղաքային գրադարանի տնօրեն Մարիա Խաչատրյանը:
Նա նշել է, որ ճակատագրի բերումով հունվար ամիսը Տերյանի համար դարձավ ծննդյան ու մահվան ամիս:
«Լինում են բանաստեղծներ, ովքեր օրերից մի օր զարթնում են` արդեն հայտնի դարձած: Նրանց շարքին է պատկանում նաև Վահան Տերյանը: Նա մի նոր թարմություն ու որակ հաղորդեց հայ քնարերգությանը: Ասում ենք Տերյան՝ հասկանում ենք ոսկեհանդերձ ու միգասքող աշուն, ցնորք ու շուշան աղջիկ, անապակ սեր, բզկտված ու հոշոտված երկիր Նաիրի, որ պիտի վեր հառնի` որպես փյունիկ, ու դառնա մի նոր Հայաստան: Նա ապրեց ընդամենը 35 տարի: Իր կյանքի այդ կարճ ժամանակահատվածում, ունենալով վատթար առողջություն, Տերյանը, այնուամենայնիվ, կարողացավ ոչ միայն հարստացնել հայ գրականությունը, այլև կատարել մեծ քաղաքական գործունեություն»,-մասնավորապես ասել է նա:
Միջոցառմանը ներկայացվել է մեծ պոետի կյանքն ու ստեղծագործությունը, երգվել ու ընթերցվել պատառիկներ նրա պոեզիայից:
