Ստեփանակերտի մշակույթի տան նախաձեռնությամբ այսօր մայրաքաղաքի Վահրամ Փափազյանի անվան պետական դրամատիկական թատրոնի հարակից տարածքում կազմակերպվել է տոնական միջոցառում՝ նվիրված Տյառնընդառաջի օրվան:
Տյառնընդառաջի օրվան նվիրված՝ Ստեփանակերտում միջոցառումներ են կազմակերպվել
ՍՏԵՓԱՆԱԿԵՐՏ, 13 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ժողովրդական սովորույթի համաձայն՝ օրհնված մոմի կրակով վառել են Տյառնընդառաջի խարույկը, որի վրայով ցատկել են նորապսակներն ու սիրահար զույգերը: Այնուհետև միջոցառման ներկաներին բաժանել են աղանդեր: Երեկոյին իրենց երգերով ու պարերով տոնական շունչ են հաղորդել Ստեփանակերտի մշակույթի տան սաները:
Մեզ հետ զրույցում Ստեփանակերտի Աստվածամոր Սուրբ հովանի Մայր տաճարի հոգևոր հովիվ Տեր Ներսես քահանա Ասրյանն ասել է, որ տոնի նախօրեին հայ առաքելական եկեղեցիներում կատարվում են տոնական ժամերգություն, նախատոնակ, իսկ հաջորդ օրը մատուցվում է Ս. Պատարագ, որից հետո՝ նորապսակների օրհնության կարգ՝ զորացնելու նրանց սերն և հավատարմությունը:
«Տյառնընդառաջը ժողովրդի մեջ արմատավորված է ժողովրդական սովորություններով՝ այդ թվում ամենատարածվածը խարույկ վառելն է, ինչն այնքան էլ ցանկալի չէ: Պետք է հասարակությունը տոնի բուն խորհուրդը պահի իր հոգում: Մենք պետք է մշտապես իրականացնենք քարոզչություն, որպեսզի քաղաքացիներին պարզ ու մատչելի լինեն հոգևոր տոներն ու դրանց նշանակությունը: Ազգային սովորույթները պետք է պահպանել, որովհետև դրանք արժեքներ են. միաժամանակ պետք է լիարժեք հասկանանք և ընկալենք»,- մասնավորապես ասել է Տեր Ներսես քահանա Ասրյանը:
Ստեփանակերտի մշակույթի տան տնօրեն, միջոցառման կազմակերպիչ Ռաֆայել Ավանեսովն ասել է, որ արդեն տասներորդ տարին է, ինչ իրենք կազմակերպում են Տյառնընդառաջի տոնակատարությունը:
Նա իր խոսքում ավելացրել է, որ նման միջոցառումների նպատակն է հանրությանը մոտ պահելը հայ առաքելական եկեղեցու տոնացույցին, ինչպես նաև յուրովի աշխուժություն մտցնելը երիտասարդության կյանքում: 
Նշենք, որ ինչպես Ստեփանակերտի տարբեր վայրերում, այնպես էլ հանրապետության բոլոր շրջաններում Տյառնընդառաջի տոնին նվիրված կազմակերպվել են մի շարք միջոցառումներ:
Տեղեկացնենք, որ հայ Առաքելական Եկեղեցին ամեն տարի՝ փետրվարի 14-ին՝ Քրիստոսի Սուրբ Ծննդյան օրվանից 40 օր հետո, նշում է քառասուն օրական մանուկ Հիսուսին տաճարին ընծայաբերելու տոնը՝ Տյառնընդառաջը։ Տյառնընդառաջ՝ նշանակում է Տիրոջն ընդառաջ գնալ։ Ամենայն հայոց Գարեգին Բ կաթողիկոսի տնօրինությամբ Տյառնընդառաջը հռչակվել է նորապսակների օրհնության օր։ Տյառնընդառաջի տոնակատարությունները սկսվում են փետրվարի 13-ի երեկոյան:
