Խորհրդարանի այսօրվա նիստում 26 կողմ ձայնով ընդունվել է «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքի նախագիծը:
«Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ են կատարվել
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ ներկայացնելով օրենքի նախագիծը՝ ԱՀ պաշտպանության նախարար, պաշտպանության բանակի հրամանատար, գեներալ-լեյտենանտ Կարեն Աբրահամյանն ասել է, որ «Զինվորական ծառայության և զինծառայողի կարգավիճակի մասին» ԱՀ օրենքի ուժի մեջ մտնելուց հետո գործող և «Զինապարտության մասին» ԱՀ օրենքներով սահմանված մի շարք կարգավորումների փոփոխության արդյունքում խնդիրներ են առաջացել պարտադիր զինվորական ծառայության միաժամանակ զորակոչվող եղբայրների և ծառայության մեջ գտնվող եղբայր ունեցող զորակոչիկների ծառայության նշանակման, պայմանագրային զինվորական ծառայության ընդունվելու տարիքի նվազեցման, պայմանագրերի կնքման ժամկետների, կադրերի տրամադրության տակ թողնելու, ակտիվ պահեստազորային ծառայության կազմակերպման, զինծառայողների բնակարանային ապահովության իրավունքի, մարտական գործողությունների մասնակցի կարգավիճակ տալու հետ կապված գործընթացներում:
Կ. Աբրահամյանը նշել է, որ, նախագծի համաձայն, ԱՀ կառավարության որոշմամբ, նախատեսվում է բացառիկ դեպքերում քաղաքացուն պարտադիր զինվորական ծառայությունից ազատելու գործընթացում իրավասու պետական մարմնի կողմից քաղաքացու դիմումը մերժելու հնարավորությունը: Սահմանվում է, որ պարտադիր զինվորական ծառայության միաժամանակ զորակոչվող եբայրների կողմից նույն զորամասում ծառայության նշանակվելու ցանկության դեպքում վիճակահանությանը մասնակցում է միայն 1 եղբայրը, իսկ ծառայության մեջ գտնվող եղբայր ունեցող զորակոչիկը եղբոր ծառայության վայր կարող է տեղափոխվել եթե բավարարում է տվյալ զորամասում ծառայության նշանակվելու պայմաններին:
«Պայմանագրային ծառայությունը հրապուրիչ դարձնելու նպատակով հնարավորություն է ընձեռվում պայմանագիր կնքել նաև 2 տարի ժամկետով, իսկ ակադեմիական ուսումնառությունը կամ պետական լիազոր մարմնի պատվերով բարձրագույն կամ հետբուհական ուսումնական հաստատություններ ավարտած անձանց համար հնարավորություն է սահմանվում նաև առաջին պայմանագիրը կնքել 2 տարուց սկսած ժամկետով՝ գործող օրենքի համաձայն՝ նվազագույն 3 տարվա փոխարեն: Վերականգնվում է նախկինում գործող պայմանագրային զինվորական ծառայության ընդունելու տարիքը՝ 40 տարեկան, իսկ հաստիքների կրճատման կամ ստորաբաժանման լուծարման կամ ատեստավորման արդյունքներով զբաղեցրած պաշտոնին չհամապատասխանելու կամ կարգապահական տույժի կարգով կադրերի տրամադրության տակ թողնելու ժամկետը առաջարկվում է սահմանել 2 ամիս՝ ներկայիս 1 ամսվա փոխարեն»,- նշել է ԱՀ ՊԲ հրամանատարը:
Կ. Աբրահամյանը տեղեկացրել է, որ օրենքի նոր նախագծով՝ հնարավորություն է ընձեռվում մատչելի և երկարաժամկետ հիփոթեքային վարկավորման ծրագրում ընդգրկել նաև ավագ ենթասպայական կազմի զինծառայողներին:
Մեկ այլ փոփոխությամբ՝ մարտական գործողությունների մասնակցի կարգավիճակ տալու գործընթացը նախատեսվում է իրականացնել միջգերատեսչական հանձնաժողովի կողմից, իսկ այդ կարգավիճակի շնորհումը՝ ԱՀ պաշտպանության նախարարի հրամանով:
Գլխադասային՝ ԱԺ պաշտպանության, անվտանգության և օրինապահպանության հարցերի մշտական հանձնաժողովն օրենքի նախագծին տվել է դրական եզրակացություն:
