Խորհրդարանն այսօրվա նիստում 26 կողմ ձայնով ընդունել է «Քրեական օրենսգրքում լրացում կատարելու մասին» օրենքի նախագիծը:
Դատարանը բացառիկ դեպքերում կնշանակի ավելի մեղմ պատիժ՝ ազատազրկման փոխարեն. Արարատ Դանիելյան
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ ներկայացնելով օրենքի նախագիծը՝ ԱՀ արդարադատության նախարար Արարատ Դանիելյանն ասել է, որ «Քրեական օրենսգրքում լրացում կատարելու մասին» նախագծով դատարանին հնարավորություն է ընձեռնվում բացառիկ դեպքերում, մարդասիրության սկզբունքից ելնելով, «Ազատազրկում» պատժատեսակի փոխարեն՝ նշանակել ավելի մեղմ պատիժ:
Ա. Դանիելյանը նշել է, որ նշված օրենքի նախագծի ընդունման անհրաժեշտությունը պայմանավորված է Քրեական օրենսգրքի 55-րդ և 62-րդ հոդվածների համակարգային վերլուծության արդյունքում դրանցով նախատեսված իրավակարգավորումների միջև ի հայտ եկած որոշակի խնդիրների լուծմամբ:
Այսպես՝ Քրեական օրենսգրքի «Կալանքը» վերտառությամբ 51-րդ հոդվածը սահմանում է, որ կալանքը չի նշանակվում դատավճիռը կայացնելու պահից 16 տարին չլրացած անձանց կամ հղի կանանց, կամ խնամքին մինչև 8 տարեկան երեխա ունեցող անձանց նկատմամբ: Մարդասիրական նկրտումներով նախատեսված այս նորմը իրավական պրակտիկայում որոշ դեպքերում կարող է հանգեցնել դրանում ընդգրկված անձանց նկատմամբ ավելի խիստ և անաչառ պատժի նշանակման: Հիշյալ խնդիրն առաջանում է այն դեպքում, երբ համապատասխան հոդվածի սանկցիան կալանք և ազատազրկում պատժատեսակներից բացի այլ պատժատեսակ չի նախատեսում: Այդպիսի պայմաններում տվյալ անձի նկատմամբ կիրառելի է դառնում միայն ազատազրկումը, ինչը ավելի խիստ պատժատեսակ է, քան կալանքը: Ազատազրկում պատժատեսակի նշանակումը կոնկրետ գործով ոչ համաչափ գնահատելու դեպքում դատարանին ոչինչ չի մնում, քան օրենսգրքի 65-րդ հոդվածի կիրառմամբ նշանակել նախատեսվածից մեղմ պատիժ՝ անգամ դրա հիմքերի բացակայության դեպքում՝ անձի իրավունքների խախտում թույլ չտալու նպատակով:
Ա. Դանիելյանի խոսքով՝ օրենսդիրի կողմից վերը հիշատակված հանցակազմերի, սանկցիաների սահմանման իրավակարգավորումները հանգեցնում են գործնական խնդիրների՝ այնքանով, որքանով դրանցում չեն նախատեսվում «Կալանք» պատժատեսակից ավելի մեղմ պատժատեսակ:
Օրենքի նախագծով՝ նախատեսվում է Քրեական օրենսգրքի 62-րդ հոդվածը լրացնել նոր բովանդակությամբ՝ «Դատավճիռը կայացնելու պահին տասնվեց տարին չլրացած անձանց կամ հղի կանանց կամ խնամքին մինչև ութ տարեկան երեխա ունեցող անձանց նկատմամբ կարող է նշանակվել օրենքով նախատեսվածից ավելի մեղմ պատիժ, եթե սույն օրենսգրքի Հատուկ մասի համապատասխան հոդվածով նախատեսված ամենամեղմ պատժատեսակը կալանքն է, և նախատեսված մյուս պատժատեսակների նշանակումը դատարանը գտնում է ոչ համաչափ, կամ կարող է նշանակվել համապատասխան հոդվածով նախատեսված մյուս պատժատեսակներից որևէ մեկը, սակայն տվյալ պատժատեսակի համար համապատասխան հոդվածով նախատեսված նվազագույն չափից ավելի ցածր չափով»:
Գլխադասային՝ ԱԺ պետաիրավական հարցերի մշտական հանձնաժողովն օրենքի նախագծին տվել է դրական եզրակացություն:
