Նախօրեին կայացած Խորհրդարանի լիագումար նիստում տեղի է ունեցել օրենսդիր-գործադիր հարցուպատասխան, որի ընթացքում կառավարության անդամները՝ պետական նախարար Գրիգորի Մարտիրոսյանի գլխավորությամբ, պատասխանել են պատգամավորների բարձրացրած հարցերին:
Ինչ հարցեր են քննարկվել օրենսդիր-գործադիր հարցուպատասխանի ժամանակ
ՍՏԵՓԱՆԱԿԵՐՏ, 21 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ խորհրդարանականների հարցերը վերաբերում էին ուսուցիչներին տրվող հավելավճարներին, վերաբնակիչների համար սեփականաշնորհման գործընթացի առանձնահատկություններին և սողանքային վայրերի անհրաժեշտ ուսումնասիրությանը:
Պատգամավոր Գագիկ Բաղունցը նշել է, որ վերջերս Ստեփանակերտի երաժշտական դպրոցի կոլեկտիվի հետ հանդիպման ժամանակ հնչեցվել է հարց՝ մինչև վերջին տարիները կոլեկտիվի որոշ աշխատակիցների՝ աշխատավարձի հետ հավելավճար ստանալու վերաբերյալ՝ հաշվի առնելով նրանց երկարամյա տարիների փորձը: Վերջերս այդ հավելավճարի տրամադրումը դադարեցվել է, իրենց իսկ ձևակերպումով, ֆինանսների բացակայության պատճառով:
Հարցին ի պատասխան՝ ԱՀ պետական նախարար Գրիգորի Մարտիրոսյանն ասել է, որ ներկայացվածն ունի լրացուցիչ ուսումնասիրման կարիք, և հրատապ ռեժիմում այն կճշտվի:
Պատգամավոր Հայկ Խանումյանի հարցը վերաբերում էր 1997-2005 թթ Արցախ տեղափոխված այն մարդկանց, ում հետ վերաբնակեցման պայմանագիր չի կնքվել, բայց, բնակարանների սեփականաշնորհման կարգի հետ կապված, կա պահանջ, որ պետք է անցնել համապատասխան ընթացակարգ:
Հարցին ի պատասխան՝ ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանն ասել է, որ այդ հարցին տարբեր ժամանակներում առիթ եղել է անդրադառնալու և քննարկումներ ունենալու:
Նախարարը նշել է, որ վերաբնակեցման գործընթացը կարգավորվում է կառավարության կողմից հաստատված որոշումներով, և այդ շրջանակներում իրականացվում է քաղաքացիներին սեփականության իրավունքով գույքի տրամադրում՝ պայմանները ապահովելու պարագայում:
«Կա հասարակության մեկ այլ շերտ, որը տեղափոխվել է և ապրում է այն շրջաններում, որտեղ մենք իրականացնում ենք վերաբնակեցման ծրագրեր, սակայն այդ քաղաքացիները չունեն վերաբնակչի կարգավիճակ: Եթե մենք դիտարկելու լինենք սեփականաշնորհման հարցերը վերաբնակեցման ծրագրի շրջանակներում, ապա այստեղ կարգավորումները հստակ են: Մենք ունենք խնդիր, որ քաղաքացիները, որոնք չունեն վերաբնակչի կարգավիճակ, ևս պետք է հնարավորություն ունենան օգտվելու սեփականաշնորհման գործընթացից՝ հաշվի առնելով, որ նրանք հանդիսանում են իրավատեր: Հարցը կառավարությունում քննարկվում է, և համապատասխան որոշումներ կայացնելուց հետո քաղաքացիների խնդիրը կլուծվի»,- հավաստիացրել է Լ. Գրիգորյանը:
Պատգամավոր Վիլեն Սաֆարյանի հարցն էլ վերաբերում էր Արցախի տարածքում առկա սողանքներին, որոնք, ըստ վերջինիս, ժողովրդական տնտեսությանը տարեկան հասցնում են առնվազն 60-65 միլիոն դրամի վնաս:
Պատգամավորը հետաքրքրվել է, թե արդյոք կառավարությունում չեն նախատեսում պետպատվերի շրջանակներում ֆինանսավորել համապատասխան՝ այդ թվում՝ գիտական աշխատանքներ իրականացնելու համար:
Հարցին ի պատասխան ԱՀ պետական նախարար Գրիգորի Մարտիրոսյանն ասել է, որ Արցախի մի շարք համայնքներում սողանքներ կան, որոնք բավականին մեծ վնաս են հասցնում: Դրանց վերաբերյալ ամփոփ վերլուծություն առայժմ չկա, սակայն, պետնախարարի խոսքով անհրաժեշտ են ֆինանսական միջոցներ և աշխատանքային ռեսուրսներ գործընթացն իրականացնելու համար:
Գ. Մարտիրոսյանը նշել է, որ հարցը կուսումնասիրվի և կձեռնարկվեն համապատասխան միջոցառումներ: