ԱՄՆ նախագահ Դոնալդ Թրամփը հայտարարել է, որ պատրաստ է միջնորդ դառնալ Քաշմիրի հարցով Պակիստանի և Հնդկաստանի միջև հակասությունների կարգավորման գործում:
«Իմ հարաբերությունները երկու ջենթլմենների հետ չափազանց ջերմ են». Թրամփն առաջարկել է միջնորդ դառնալ Հնդկաստանի և Պակիստանի հաշտեցման գործում
ՍՏԵՓԱՆԱԿԵՐՏ, 26 փետրվարի, ԱՐՑԱԽՊՐԵՍ: Հնդկաստան կատարած ուղևորության երկրորդ օրը Նյու Դելիում կայացած մամուլի ասուլիսի ժամանակ, պատասխանելով Քաշմիրի վերաբերյալ Պակիստանի և Հնդկաստանի միջև հակասությունների վերաբերյալ հարցին, Սպիտակ տան ղեկավարն ասել է, որ պատրաստ է Հնդկաստանի և Պակիստանի միջև բանակցություններում հանդես գալ միջնորդի դերում, հայտնում է Tert.am-ը:
«Եթե որպես միջնորդ կարողանամ որևէ բան փոխել, ես դա կանեմ: Ես կանեմ ինձնից կախված ամեն ինչ, քանի որ իմ հարաբերությունները երկու ջենթլմենների (Հնդկաստանի վարչապետ Նարենդրա Մոդիի և Պակիստանի վարչապետ Իմրան Խանի) հետ շատ ջերմ են»,- ասել է Թրամփը:
Հնդկա-պակիստանյան հակամարտությունը Հնդկաստանի և Պակիստանի միջև սկսվել է վերջիններիս անկախանալուց հետո 1947 թվականին։ Հակամարտության գլխավոր պատճառը Քաշմիր նահանգն էր, որն անցել էր Հնդկաստանի կազմի մեջ, չնայած նրան, որ այստեղի բնակչությունը մեծամասամբ մահմեդական էր։