Արցախում գյուղատնտեսության և ձկնորսության համախառն արտադրանքը 2019 թվականին, փաստացի, գներով կազմել է 70.6 մլրդ դրամ:
Անցած տարում գյուղատնտեսության և ձկնորսության համախառն արտադրանքը կազմել է 70.6 մլրդ դրամ
ՍՏԵՓԱՆԱԿԵՐՏ, 28 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ամփոփիչ մամուլի ասուլիսի ժամանակ ասել է ԱՀ Ազգային վիճակագրական ծառայության նախագահ Մանուշ Մինասյանը:
Նրա խոսքով՝ գյուղատնտեսության համախառն արտադրանքը, 2018թ. համեմատությամբ, համադրելի գներով, նվազել է 3.7 %-ով, ինչը պայմանավորված է բուսաբուծության համախառն արտադրանքի նվազմամբ՝ մոտ 11.2%: Գյուղատնտեսության համախառն արտադրանքի 43.6%-ը բաժին է ընկել բուսաբուծության, 56.4%-ը անասնաբուծության ճյուղին:
«2019թ. գյուղատնտեսության համախառն արտադրանքի կառուցվածքում գերակշռող բաժինը պատկանում է մսի (36.7տոկոս), հացահատիկի և հատիկաընդեղենի (ներառյալ եգիպտացորեն) (19.5 տոկոս), կաթի (13.4 տոկոս) արտադրությանը: Նախորդ տարվա հունվարի 1-ի համեմատ՝ 6.4%-ով աճել է ԽԵԱ գլխաքանակը, այդ թվում կովերինը` 4.2 %-ով, 2.1%-ով խոզերի գլխաքանակը, ոչխարների ու այծերի գլխաքանակը նվազել են 18.4%-ով, թռչուններինը՝ 11.6%-ով: 2019թ. հանրապետությունում սպանդի համար իրացվել է 15.2 հազ. տոննա (կենդանի քաշով) անասուն և թռչուն (նախորդ տարվա համեմատ աճելով 3.7 %-ով), արտադրվել է 44.2 հազ.տոննա կաթ (աճելով 3.1 %-ով), 47.3 մլն հատ ձու (նվազելով 1.6 %-ով) և 205 տոննա (ֆիզիկական քաշով) բուրդ (նախորդ տարվա համեմատ աճելով 15.4 %-ով)»,- մանրամասնել է Մ. Մինասյանը: