Արցախում Նոր կորոնավիրուսի դեպքեր չեն արձանագրվել:
Եթե հանրապետությունում արձանագրվի Նոր կորոնավիրուսի որևէ դեպք, հանրությանն անպայման կտեղեկացնենք. նախարար
ՍՏԵՓԱՆԱԿԵՐՏ, 24 մարտի, ԱՐՑԱԽՊՐԵՍ: Խորհրդակցությունից հետո այս մասին «Արցախպրես»-ի թղթակցի հետ զրույցում ասել է ԱՀ առողջապահության նախարար Արայիկ Բաղրյանը՝ կրկին հավաստիացնելով, որ ՀՀ ուղարկված բոլոր փորձանմուշների պատասխանները բացասական են:
Նախարարի խոսքով՝ անհրաժեշտ բժշկական սարքավորումները, պարագաները և ախտահանիչ միջոցները համալրվում են, և այդ գործընթացը լինելու է շարունակական:
«Այսօր ԱՄՆ-ից բժշկական պարագաների որոշ խմբաքանակ են ուղարկել ՀՀ և դրանց մի մասը տրամադրել են մեզ, որոնք այսօր կպահեստավորնեք: Անցակետերում էլ ավելի ենք խստացնում հսկողությունը, և ամենօրյա աշխատանքների մեջ, ըստ իրավիճակի, հնարավոր են որոշակի փոփոխություններ. հաշվի ենք առնում նաև քաղաքացիների հորդորները»,-տեղեկացրել է Ա. Բաղրյանը:
Նախարարի հրամանով՝ հանրապետության բոլոր բուժհիմնարկներում պետք է լինեն առանձնացված բաժանմունքներ և Շուշիի հիվանդանոցը որպես առանձին բուժմիավորում է ծառայելու:
Այն մասին, թե իբր հանրապետությունում կա Նոր կորոնավիրուսի դեպք, որը թաքցվում է, Ա. Բաղրյանն ասել է, որ բազմիցս հայտարարել են, որ հետևեն միայն Արցախում գործող տեղեկատվական օպերատիվ շտաբի կողմից արձակված փաստացի ու հավաստի տվյալներին, և ևս մեկ անգամ հաստատել է, որ Արցախում Նոր կորոնավիրուսի տարածման դեպք չկա:
«Եթե հանրապետությունում արձանագրվի Նոր կորոնավիրուսի որևէ դեպք, հանրությանն անպայման կտեղեկացնենք: Առայժմ որևէ նման խնդիր չկա»,-ընդգծել է Ա. Բաղրյանը: