ԱՀ Ոստիկանության կողմից տրամադրված տվյալների համաձայն՝ այսօրվա դրությամբ Արցախի Հանրապետության ընտրողների թիվը կազմում է 103 հազար 663:
Արցախի 103 հազար 663 ընտրողներին կսպասարկի 282 ընտրական տեղամաս
ՍՏԵՓԱՆԱԿԵՐՏ, 30 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած առցանց մամուլի ասուլիսի ընթացքում ասել է ԱՀ Կենտրոնական ընտրական հանձնաժողովի նախագահ Սրբուհի Արզումանյանը:
Նրա խոսքով՝ համապետական ընտրություններն անց են կացվելու Արցախի բոլոր 228 համայնքներում: Գործում է 8 ընտրական հանձնաժողով՝ Ստեփանակերտ քաղաքում և Արցախի 7 շրջաններում: Ընդհանուր առմամբ, կազմավորվել են 282 ընտրական տեղամասեր: Ընդ որում՝ ընտրական 1 տեղամաս կգործի Երևան քաղաքում՝ Հայաստանի Հանրապետությունում Արցախի Հանրապետության մշտական ներկայացուցչության գտնվելու վայրում: Եվս 1 ընտրատեղամաս կգործի Շուշիի քրեակատարողական հիմնարկում:
Ս. Արզումանյանը տեղեկացրել է, որ 2300-ից ավելի հանձնաժողովականներ այսօր պատրաստ են իրականացնելու իրենց գործառույթները, որպեսզի արցախցի ընտրողները իրենց զգան ապահով և վստահելի:
Անդրադառնալով նախընտրական քարոզարշավին՝ ԿԸՀ նախագահն ընդգծել է, որ, հաշվի առնելով ընտրություններին մասնակցող թեկնածուական բավականին մեծ կազմերը, նախընտրական գործընթացը չէր կարող զերծ լինել որոշակի դժգոհություններից և խախտումներից:
Ս. Արզումանյանը նշել է, որ նախընտրական քարոզարշավի ընթացքում արձանագրված խախտումների, դժգոհությունների, թերությունների ու առաջարկությունների վերաբերյալ դիմումները կամփոփվեն ԿԸՀ-ում և կներկայացվեն հանրության դատին:
