ԱՀ Հանրային ծառայությունները և տնտեսական մրցակցությունը կարգավորող պետական հանձնաժողովի նախագահ Միքայել Վիրաբյանը ու ՀՀ Հեռուստատեսության և ռադիոյի հանձնաժողովի նախագահ Տիգրանն Հակոբյանն այսօր հանդես են եկել մամուլի ասուլիսով:
Նախընտրական քարոզչության ժամանակահատվածում հեռարձակված հեռուստառադիոհաղորդումներում խախտումներ չեն արձանագրվել. Միքայել Վիրաբյան
ՍՏԵՓԱՆԱԿԵՐՏ, 1 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ ասուլիսին ոլորտի պատասխանատուներն անդրադարձել են մարտի 31-ին կայացած համապետական ընտրությունների քարոզչության ժամանակահատվածում վերգետնյա եթերային հեռարձակում իրականացնող հեռուստաընկերությունների և ռադիոընկերությունների կողմից քարոզչության կողմերի համար հավասար պայմանների տրամադրմանը:
Իր խոսքում Միքայել Վիրաբյանն ասել է, որ Արցախի Հանրապետությունում գործող 1 հանրային և 16 մասնավոր հեռուստառադիոընկերություններից Արցախի Հանրապետությունում համապետական ընտրությունների քարոզչության լուսաբանման գործընթացին մասնակցելու ցանկություն են հայտնել Արցախի հանրային հեռուստառադիոընկերությունը, «Արցախկապ»-ը, «Փեյս» հեռուստառադիոընկերությունը, «Միքս Մեդիան», «Ռադիո FM 103»-ը, «Ազգային ռադիո և հեռուստատեսություն», «էքսելենթ Տելեսիսթեմս», «Դիջիթալ Սմայլ» ընկերությունները, ինչի մասին վերջիններս պատշաճ կերպով տեղեկացրել են Հանձնաժողովին և օրենքով սահմանված կարգով հայտարարել են իրենց վճարովի եթերաժամի սակագների մասին:
«Մշտադիտարկման արդյունքների հիման վրա կազմված եզրակացության համաձայն՝ նշված ժամանակահատվածում վերգետնյա եթերային հեռարձակում իրականացնող հեռուստաընկերությունների, ռադիոընկերությունների կողմից հեռարձակած հեռուստառադիոհաղորդումներում ԱՀ ընտրական օրենսդրությանը անհամապատասխանության խախտումներ չեն արձանագրվել, և հաշվետու ժամանակահատվածում նախագահի թեկնածուների, կուսակցությունների (կուսակցությունների դաշինքների), պետական մարմինների, հասարակական կազմակերպությունների կողմից Հանձնաժողով պաշտոնապես ոչ մի բողոք չի ներկայացվել և թեկնածուներին տրվել են հավասար հնարավորություններ- նշել է Մ. Վիրաբյանը:
Նրա խոսքով՝ նախընտրական քարոզչության ընթացքում վերգետնյա եթերային հեռարձակում իրականացնող հեռուստաընկերությունների և ռադիոընկերությունների կողմից վճարովի եթերաժամի մեկ րոպեի գինը փոփոխության չի ենթարկվել:
Իր հերթին Տիգրան Հակոբյանն ասել է, որ նման մշտադիտարկում Արցախի պատմության մեջ իրականացվում է առաջին անգամ: Ի դեպ, առաջին անգամ վերգետնյա հեռարձակողների համար մշակվել է հատուկ մեթոդաբանություն:
«Արցախում ստեղծված է հեռուստառադիոընկերությունների գործունեությունը կարգավորող և քարոզարշավի համապատասխանությունը օրենքին ստուգման համակարգ, որը գործում է աշխարհի առաջատար երկրներում: Կարծում եմ՝ Արցախում հիմք է ստեղծվել եվրոպական ստանդարտներին համապատասխան մշտադիտարկման և կարգավորման մեխանիզմ»,- ավելացրել է Տ. Հակոբյանը:
