Այսօր` ապրիլի 7-ին, ԱՀ կենտրոնական ընտրական հանձնաժողովը հրավիրել է հերթական նիստը, որը նվիրված էր ԱՀ նախագահական ընտրությունների երկրորդ փուլին:
Ապրիլի 14-ին տեղի կունենա ընտրությունների երկրորդ փուլը. հայտնի են թեկնածուների համարները քվեաթերթիկում
ՍՏԵՓԱՆԱԿԵՐՏ, 7 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ նիստին ԱՀ կենտրոնական ընտրական հանձնաժողովի (ԿԸՀ) նախագահ Սրբուհի Արզումանյանը՝ ներկայացնելով օրակարգում ներառված Արցախի Հանրապետության նախագահի ընտրությունների երկրորդ փուլ անցկացնելու մասին հարցը, ասել է, որ ԱՀ Սահմանադրության 89-րդ հոդվածի երրորդ մասով և Ընտրական օրենսգրքի 92-րդ հոդվածի 1-ին մասի երկրորդ կետով, 97-րդ հոդվածի երրորդ մասով նախատեսվում է ընտրությունների երկրորդ փուլի անցկացում, եթե ընտրություններին մասնակցած թեկնածուներից և ոչ մեկը չի ստացել բոլոր թեկնածուների կողմ քվեարկած ձայների կեսից ավելին:
«Համաձայն օրենքի՝ քվեարկությանը հաջորդող 14-րդ օրը՝ այսինքն ապրիլի 14-ին պետք է անցկացվեն ընտրություններ: Հաշվի առնելով ԱՀ Ազգային ժողովի և նախագահական ընտրությունների 2020 թվականի մարտի 31-ի արդյունքները՝ ԱՀ ԿԸՀ-ն որոշում է 2020 թվականի ապրիլի 14-ին անցկացնել ընտրությունների երկրորդ փուլ: Քվեարկության օրը հայտարարվում է ոչ աշխատանքային»,-ավելացրել է Ս. Արզումանյանը:
ԿԸՀ որոշմամբ՝ նիստին տեղի է ունեցել վիճակահանություն, որի արդյունքում պարզ է դարձել, թե հանրապետության նախագահի թեկնածուները որ համարի ներքո են մասնակցելու քարոզարշավին և զբաղեցնելու քվեաթերթիկներում իրենց տեղը:
Վիճակահանության արդյունքում՝ 1-ին համարի ներքո հանդես է գալու ԱՀ նախագահի թեկնածու Մասիս Մայիլյանը և 2-րդ համարի ներքո՝ Արայիկ Հարությունյանը:
