Այսօր՝ ապրիլի 7-ին, լրացավ Ստեփանակերտի Աստվածամոր Սուրբ Հովանի Մայր Տաճարի օծման և բացման մեկ տարին:
Ստեփանակերտի Մայր Տաճարը շատերի համար դարձել է ուխտատեղի. այսօր լրացավ տաճարի բացման մեկ տարին
ՍՏԵՓԱՆԱԿԵՐՏ, 7 ապրիլի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Հայ առաքելական Սուրբ եկեղեցու քրիստոնեական դաստիարակության և քարոզչության կենտրոնի տնօրեն, Ասկերանի Ս. Աստվածածին եկեղեցու հոգևոր հովիվ Տեր Մեսրոպ քահանա Խունոյանն ասել է, որ Մայր տաճարի կառուցումը կարևոր էր այնքանով, որ Արցախը, արցախցին ունենան Առաջնորդանիստ եկեղեցի, Մայր աղոթատեղի։
«Եկեղեցին երկրի վրա ունի իր առանձնահատուկ դերը՝ լինել աղոթատեղի, որտեղ հավատացյալը աղոթքի միջոցով հաղորդակցվում է Աստծո հետ։ Սրանից ելնելով՝ մենք շատ կարևոր ենք համարում եկեղեցաշինությունը, որը պետք է հոգա մարդկանց հոգու կարիքները»,-մասնավորապես ավելացրել է մեր զրուցակիցը։
Եկեղեցու սպասավորի խոսքով՝ Ստեփանակերտի Աստվածամոր Սուրբ Հովանի Մայր Տաճարը տեղացիների, ինչպես նաև օտարերկրացիների համար արդեն դարձել է սիրելի ուխտատեղի: Նկատելի է, որ այստեղ Աստծո օրհնությունն են ստանում նաև մեծ թվով նորապսակներ, նորածիններ, ինչպես նաև կատարվում են մկրտության արողություններ:
Հիշեցնենք, որ Աստվածամոր Սուրբ Հովանի Մայր Տաճարի օծման արարողությունն իրականացրել էր Ամենայն Հայոց Կաթողիկոս Ն.Ս.Օ.Տ.Տ Գարեգին Բ-ն, որից հետո իր ձեռամբ մատուցել է առաջին պատարագը:
Նշենք, որ բազմանկյուն եռահարկ եկեղեցու բարձրությունն ավելի քան 40 մետր է, խաչի բարձրությունը՝ 3 մետր։ Ճարտարապետը Գագիկ Երանոսյանն է:
