ՍՏԵՓԱՆԱԿԵՐՏ, 7 ապրիլի, ԱՐՑԱԽՊՐԵՍ։  «Արցախպրես»-ի թղթակցի հաղորդմամբ՝ ասուլիսին ԱՀ պետական նախարար Գրիգորի Մարտիրոսյանն ասել է, որ վարակակիր քաղաքացին 1957 թվականին ծնված բնակիչ է, ով Արցախ է ժամանել մարտի 30-ին, ՀՀ Արտաշատի շրջանից: Առողջապահական համակարգի պատասխանատուները, օպերատիվ կապի մեջ գտնվելով ՀՀ գործընկերների հետ, տեղեկացել են, որ այդ քաղաքացու ընտանիքի անդամները, որոնք ապրում են Արտաշատի շրջանում, վարակակիրներ են, և  տվյալ անձը ապրիլի 2-ին մեկուսացվել է Քաշաթաղի շրջանային բուժմիավորումում՝ պահվելով հսկողության տակ:

«Հիմք ընդունելով սահմանված մեթոդաբանությունը՝ որոնց համաձայն վարակված անձի հետ շփված անձանց թեստավորումը ախտանիշների բացակայության պարագայում կատարվում է մեկուսացման 13-րդ օրը, այդ անձը, որը ախտանիշներ չի ունեցել, հսկողության տակ է պահվել մեկուսացված ձևով, մինչև տվյալ ժամկետի լրացումը: Հաշվի առնելով, որ այս ընթացքում Արտաշատի շրջանում ապրող իր ընտանիքի անդամների մոտ հաստատվել է վարակվածության դեպքը, մեր առողջապահության ոլորտի պատասխանատուները ապրիլի 6-ին թեստավորել են քաղաքացուն և փորձանմուշը ուղարկվել է ՀՀ համապատասխան լաբորատորիա, որի պատասխանն էլ ստացվել է այսօր»,- մանրամասնել է Գ. Մարտիրոսյանը:

Կորոնավիրուսով վարակված քաղաքացու հետ շփում ունեցող անձանց շրջանակը հայտնի է: Այդ նպատակով ինքնամեկուսացվել է շուրջ 17 քաղաքացի: Բացի դրանից, հաշվի առնելով այն հանգամանքը, որ քաղաքացին ապրում է փոքր գյուղում, որոշում է կայացվել Միրիկի բոլոր բնակիչների համար սահմանել ինքնամեկուսացման ռեժիմ:

Պետնախարարի խոսքով՝ բոլոր բնակիչները կապահովվեն անհրաժեշտ բնակկենցաղային պայմաններով: Թե՛ սննդի և թե՛ անհրաժեշտ այլ պարագանների մատակարարման համար կստեղծվեն հնարավորություններ: Արդեն վաղը կախտահանվեն Միրիկի բոլոր առանձնատները, բնակիչներին էլ կտրամադրվեն ախտահանման միջոցներ:

Ինչ վերաբերում է վարակված քաղաքացուն, Գ. Մարտիրոսյանը նշել է, որ նա բուժում կստանա Երևան քաղաքում՝ հաշվի առնելով, որ անձը գտնվում է ռիսկային խմբում: Առողջապահության նախարարության շտապօգնության մեքենայով քաղաքացին ուղարկվել է ՀՀ:

ԱՀ առողջապահության նախարար Արայիկ Բաղրյանն էլ նշել է, որ, անհրաժեշտության դեպքում, Միրիկի բոլոր բնակիչներին կթեստավորեն, սակայն առայժմ թեստավորումը կիրականացվի՝ ըստ առաջնահերթությունների: Ըստ այդմ՝ Միրիկում 24-ժամյա ռեժիմով կգործի բժշկական կետ:

Առողջապահության նախարարի խոսքով՝ Արցախում ևս հնարավոր է բուժում իրականացնել: Բոլոր շրջաններում կան մեկուսացված վայրեր, առանձնացվել է նաև բուժհիմնարկ: Ի դեպ, վարակակիրի մոտ ուղեկցող այլ հիվանդություններ չեն հայտնաբերվել:

Ա. Բաղրյանը տեղեկացրել է, որ մինչ օրս թեստավորում է իրականացվել 34 քաղաքացու մոտ:

Մամուլի ասուլիսին ոլորտի պատասխանատուները պատասխանել են լրագրողների կողմից բարձրացված հարցերին: