Զատկից առաջ խաչերթը, որը ըստ կաթոլիկական ավանդույթի՝ անցկացվում է Չարչարանաց ուրբաթ երեկոյան, 55 տարի հետո առաջին անգամ անցկացվելու է Սուրբ Պետրոսի տաճարի հրապարակում, այլ ոչ Կոլիզեումի պատերի մոտ:
Հռոմի պապը կգլխավորի խաչերթը, որը կես դարում առաջին անգամ չի անցկացվի Կոլիզեումի պատերի մոտ
ՍՏԵՓԱՆԱԿԵՐՏ, 10 ապրիլի, ԱՐՑԱԽՊՐԵՍ:Սուրբ գահի մամուլի ծառայությունը հայտնել է, որ երթը գլխավորելու է Հռոմի պապ Ֆրանցիսկոսը, իսկ խաչը տանելու են 5-ական մարդուց կազմված երկու խմբերը, փոխանցում է News.am-ը:
Հինգ մարդու ներկայացնելու են Պադուայի ուղղիչ հաստատությունից, եւս հինգին՝ Վատիկանի առողջապահության եւ հիգիենայի վարչության աշխատակիցները: Երթը սկսվելու է հրապարակի կենտրոնում գտնվող կոթողի մոտից (այն հիշեցնում է Հավերժական քաղաքի անտիկ պատմության մասին), այնուհետեւ կշարունակվի ծածկի տակ, որտեղ տեղադրված է հռոմեական Սան Մարչելո եկեղեցուց խաչելությունը, որը, ավանդույթի համաձայն, XVI դարում քաղաքն ազատել է ժանտախտի համաճարակից:
Խաչերթին բանտի ներկայացուցիչների մասնակցությունը պատահական չէ: Հենց այս հաստատությունում են հեղինակներ ընտրվել խորհրդածությունների տեքստերը գրելու համար, որոնք ընթերցվում են 14 դադարների ժամանակ եւ խորհրդանշում են Գողգոթա Քրիստոսի բարձրանալն ու նրա նահատակության դրվագները: Տեքստերը գրելուն ներգրավվել են ինչպես բանտարկյալներ, այնպես էլ հսկիչներ, ինչպես նաեւ բանտարկյալների մերձավորները: Հատվածներից մեկը հանձնարարել են գրել ցմահ բանտարկության դատապարտվածի դստերը, իսկ մյուսը՝ սպանված աղջկա ծնողներին:
Համավարակի պատճառով խաչերթն անցկացվելու է առանց հավատացյալների, այն ամբողջ աշխարհում կցուցադրվի մի քանի հեռուստաալիքների ուղիղ եթերում, ինչպես նաեւ համացանցային ալիքներով, ներառյալ Vatican News պորտալով:
