«Իսլամական պետություն» ահաբեկչական խմբավորման չեզոքացված առաջնորդ Աբու Բաքր ալ-Բաղդադիի՝ չորեքշաբթի օրը ձեռբակալված հնարավոր իրավահաջորդներից մեկը՝ Աբդուլլահ Քարդաշը, պատասխանատու էր իպրիտի՝ մանանեխի գազի արտադրության համար, որն օգտագործվում էր իրաքյան զորքերի վրա հարձակման համար, նշվում է Իրաքի անվտանգության մամուլի ծառայության հաղորդագրության մեջ:
Իրաքում պատմել են ալ-Բաղդադիի հնարավոր իրավահաջորդի ձերբակալման մասին
ՍՏԵՓԱՆԱԿԵՐՏ, 21 մայիսի, ԱՐՑԱԽՊՐԵՍ։ Ավելի վաղ Իրաքի ազգային հետախուզությունը հաղորդել էր Քարդաշի ձերբակալության մասին: Հայտարարության համաձայն՝ 2011-ի վերջին Քարդաշը ծանոթացել էր Ալ-Բաղդադիի հետ: Հաղորդվում է, որ հետագայում Քարդաշը գտնվում էր Սիրիայում, որտեղ, մասնավորապես, զբաղվում էր «զենքի եւ զինամթերքի արտադրության գործարաններով», ինչպես նաեւ մի շարք բարձրաստիճան պաշտոններ էր զբաղեցնում ԻՊ-ում, հայտնում է News.am-ը:
Իրաքի անվտանգության մարմինների մամուլի ծառայությունը հայտնել է, որ Քարդաշը պատասխանատու էր նաեւ Իրաքում մանանեխի գազի արտադրության համար, որն օգտագործվում էր իրաքյան ուժերի վրա հարձակման համար եւ կարևոր դեր էր խաղում «Իսլամական պետության» եւ այլ ահաբեկչական խմբավորումների միջեւ բանակցություններում:
Լրատվամիջոցներն Աբդուլլահ Քարդաշին «Իսլամական պետության» նոր առաջնորդ էին անվանում, ըստ Guardian թերթի, պարզվել էր, որ դա խմբավորման հիմնադիրներից մեկը՝ Ամիր Մոհամմադ Աբդուլ Ռահման ալ-Մավլյա ալ-Սալբին էր: Ըստ թերթի տվյալների, որոնք ստացվել էին երկու հետախուզական կազմակերպությունների ներկայացուցիչներից, իրաքցի Ամիր ալ-Սալբին «Իսլամական պետության» առաջնորդ է նշանակվել 2019 թվականի հոկտեմբերին՝ խմբի նախկին ղեկավար Աբու Բաքրա ալ-Բաղդադիի չեզոքացումից մի քանի ժամ անց: Պարբերականը գրում է, որ նա հայտնի է նաեւ Հաջի Աբդուլլա եւ Աբդալլա Քարդաշ կեղծանուններով:
