Շնորհավորում եմ ԱՀ չորրորդ նախագահ Արայիկ Հարությունյանին՝ պաշտոնը ստանձնելու առիթով:
«Արցախի ժողովուրդն ընտրություններում արտահայտել է բարեփոխումներ իրականացնելու իր աներկբա կամքը». Նիկոլ Փաշինյան
ՍՏԵՓԱՆԱԿԵՐՏ, 21 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մայիսի 21-ին, ԱՀ նորընտիր նախագահ Արայիկ Հարությունյանի պաշտոնի ստանձնմանը նվիրված միջոցառման ժամանակ ասել է ՀՀ վարչապետ Նիկոլ Փաշինյանը:
Նա նշել է, որ ինքը համոզված է, որ Արայիկ Հարությունյանի նախագահության շրջանում Արցախի և Հայաստանի համագործակցությունն էլ ավելի արդյունավետ կդառնա:
«Հայաստանի կառավարությունն ուշի ուշով հետևել է Արցախում տեղի ունեցող ընտրական գործընթացներին: Ընտրություններից առաջ ոմանք կանխատեսում էին, որ Արցախում տեղի կունենա հեղափոխություն, իսկ ոմանք էլ՝ հակահեղափոխություն: Ի սկզբանե իմ դիրքորոշումը եղել է այն, որ Արցախը չպետք է լինի ոչ հեղափոխության, ոչ էլ հակահեղափոխության թատերաբեմ: Թե՛ խորհրդարանական և թե՛ նախագահական ընտրություններում վստահ հաղթանակ են տարել ներկայումս իշխանության մեջ ընդգրկված ուժերը, և ԱՀ նախագահ է ընտրվել Արայիկ Հարությունյանը: Այսպիսի ընտրությունը նշանակում է, որ, չնայած հենց բուն Արցախում հեղափոխություն տեղի չի ունեցել, բայց Արցախն ամբողջությամբ և աներկբայորեն հեղափոխության մաս է: Արցախի ժողովուրդն ընտրությունների արդյունքներով արտահայտել է բարեփոխումներ իրականացնելու, քաղաքական ուղեգիծ որդեգրելու իր աներկբա կամքը: Այս առումով ԱՀ նորընտիր իշխանությունը Հայաստանի և Արցախի իշխանությունները միասնական և հավաքական պատասխանատվություն ունեն հայ ժողովրդի առաջ՝ բարեփոխումներ իրականացնելու Հայաստանում և Արցախում: Մարդիկ պետք է տեսնեն ու զգան փոփոխություններ՝ քաղաքական, տնտեսական, սոցիալական, հակակոռուպցիոն, մարդու իրավունքների պաշտպանության, անկախ դատական համակարգի, խոսքի ազատության, ընտրական համակարգի, արդարության և վստահության ոլորտներում: Համոզված եմ, որ այդ փոփոխությունները տեղի կունենան, սա ընդամենը քաղաքական հայտարարություն չէ, այլ հստակ ձևակերպված ըմբռնում, եթե չասենք պայմանավորվածություն Հայաստանի և Արցախի ղեկավարների միջև: Ուզում եմ հստակ ընդգծել, որ հավատում եմ Արցախի ժողովրդի՝ բարեփոխումների, ստեղծարար փոփոխությունների ճանապարհով գնալու քաղաքական կամքին ու վճռականությանը: Հավատում եմ, որ երկար տարիներ Արայիկ Հարությունյանի՝ Արցախի վարչապետ լինելու ձեր փորձառությունը մեզ պիտի տանի ոչ թե անցյալի ճանապարհներով, այլ պիտի օգնի չկրկնել անցյալի մեր սխալները: Պիտի օգնի իմաստության դասեր քաղել անցյալի սխալներից: Մենք առաջ գնալու կամք ունենք»,-մասնավորապես ասել է Ն. Փաշինյանը:
