Արցախի Հանրապետության Նախագահ Արայիկ Հարությունյանը ֆեյսբուքյան ուղիղ եթերի ընթացքում անդրադարձել է կադրային նոր նշանակումներին և կառավարությունում սպասվող կառուցվածքային փոփոխություններին:
«Պաշտոն չենք տալիս ոչ մեկին, առաջարկում ենք ստանձնել պատասխանատվություն». Նախագահը՝ նոր նշանակումների մասին (Տեսանյութ)
ՍՏԵՓԱՆԱԿԵՐՏ, 26 մայիսի, ԱՐՑԱԽՊՐԵՍ։ «Արցախպրես»-ի փոխանցմամբ՝ իր խոսքում Արայիկ Հարությունյանը նշել է, որ վերջին մի քանի օրերի ընթացքում բանակցություններ են ընթացել տարբեր քաղաքական ուժերի հետ: Քաղաքական ամենամեծ ձեռքբերումը Ա. Հարությունյանը համարում է «Միասնական հայրենիք» կուսակցության և նրա ղեկավար Սամվել Բաբայանի հետ ձեռքբերված պայմանավորածությունը, որը հուշագրի տեսքով ներկայացվել է հանրության դատին:
Հետագա համագործակցության առումով նորընտիր նախագահն առանձնացնում է նախագահական ընտրություններին մասնակից թեկնածու, ներկայիս արտաքին գործերի նախարար Մասիս Մայիլյանի հետ հանդիպումների արդյունքում գրանցած հաջողությունները: Միաժամանակ, Ա. Հարությունյանը նշել է, որ համերաշխության ու միասնականության օրակարգը, որը ներկայացվել է իրենց կողմից, այդ ամենի ապացույցն է:
«Մեր մնացած քաղաքական գործիչներին կոչ կանեի չվիրավորել պետականաշինության գործում դեր ունեցած մեր հայրենիքի զավակներին: Մի՛ փորձեք ազգի ապագայի, մեր երկրի հանդեպ ստանձնած պարտավորվածության արդյունքում ձեռք բերված համաձայնությունը պիտակավորել: Պաշտոն չենք տալիս ոչ մեկին, և պաշտոն չենք տալու ոչ մեկին: Մենք առաջարկում ենք պատասխանատվություն ստանձնել երկրի ապագայի նկատմամբ: Ապրում ենք ճակատագրական ժամանակահատվածում, և այս առումով մեր առաքելությունը չենք իրականացնելու պաշտոնով: Իսկ այն քաղաքական ուժերը և գործիչները, ովքեր ստացել են հանրության վստահության քվեն, իրենց մասնաբաժնով մասնակցություն կունենան երկրի կառավարման գործին»,- նշել է Ա. Հարությունյանը:
Քաղաքական պայքարի արդյունքում ձևավորվել է քաղաքական նոր դաշտ և, ըստ նորընտիր նախագահի, այդ դաշտի խաղացողների հիմնական նպատակը պետք է լինի Արցախի ապագան:
Ա. Հարությունյանը կրկին հիշեցրել է, որ համագործակցելու են բոլորի հետ անխտիր՝ միասնության ու համերաշխության ընդհանուր օրակարգի շուրջ:
Ֆեյսբուքյան ուղիղ եթերի ընթացքում Արցախի Նախագահը տեղեկացրել է, որ այսօր՝ ժամը 12:00-ին, պետական բարձրաստիճան պաշտոնյաների մասնակցությամբ կանցկացնի ընդլայնված կազմով խորհրդակցություն, որի ընթացքում նրանցից շատերին հրաժեշտ կտան: Օրվա ընթացքում էլ կլինեն նոր նշանակումներ, մի քանի օրերի ընթացքում կառավարության կազմում նշանակումները կամբողջացվեն:
«Արդեն հունիսի 1-ից բերքահավաքի կարևոր ժամանակահատվածում կունենանք ձևավորված նոր կառավարություն: Կլինեն նոր նախարարների նշանակումներ, բացի դրանից, փոփոխություններ կլինեն վարչակազմերի ինստիտուտներում: Ի դեպ, ուղիղ 9:00-ին բոլոր պաշտոնյաները պետք է լինեն իրենց աշխատասենյակներում և պահպանեն աշխատանքային գրաֆիկը: Կատեգորիկ արգելվելու է շռայլություններից օգտվելը: Եվ այս ամենը լինելու է իմ ուշադրության կենտրոնում: Բոլորի աշխատանքում հաշվետվողականությունը պետք է լինի գլխավոր պայմաններից մեկը»,- ավելացրել է Ա. Հարությունյանը: