Մայիսի 26-ին տեսակապի ձևաչափով ՀԱՊԿ անդամ պետությունների արտաքին գործերի նախարարների խորհրդի նիստին ՀՀ արտաքին գործերի նախարար Զոհրաբ Մնացականյանն իր ելույթում մասնավորապես մի քանի շեշտադրումներ է կատարել՝ կապված կորոնովիրուսով պայմանավորված նոր աշխարհաքաղաքական իրողությունների հետ:
Հակամարտությունը պետք է լուծվի բանակցային կարգավորմամբ. քաղաքագետն անդրադարձել է արտգործնախարարների խորհրդի նիստին
ՍՏԵՓԱՆԱԿԵՐՏ, 27 մայիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է քաղաքագետ Նելլի Բաղդասարյանը՝ մեկնաբանելով ՀԱՊԿ անդամ պետությունների արտաքին գործերի նախարարների խորհրդի նիստը:
Նրա խոսքով՝ ՄԱԿ-ի գլխավոր քարտուղարի կողմից հակամարտության մեջ գտնվող պետություններին կոչ էր արվել ուշադրության կենտրոնում պահել բռնության դադարեցման և հակամարտությունների նվազագույն լարվածության հասցնելու վերաբերյալ հարցերը:
«Զոհրաբ Մնացականյանի կողմից նշվեց, որ Ադրբեջանի կողմից հերթական անգամ այդ կոչն անտեսվել է: Այն դեպքում, երբ ՀՀ-ն և ԱՀ-ն մշտապես հավատարիմ են ուժի սպառնալիքի չկիրառման միջազգային սկզբունքին: Անգամ այդ պայմաններում Ադրբեջանն ամեն կերպ փորձում է հրադադարը խախտել: Նիստին՝ ՀՀ ԱԳ նախարարի կողմից նաև այն հանգամանքը մատնանշվեց, որ ՀՀ և ԱՀ նոր իշխանությունների կողմից արվելու է ամեն ինչ՝ խնդիրը լուծելու ԵԱՀԿ Մինսկի խմբի համանախագահների կողմից առաջարկված ձևաչափով: ՀՀ-ն և ԱՀ-ն կողմ են Մինսկի խմբի հիմնարար սկզբունքներին: Եթե ընդհանրացնելու լինեմ, ապա պիտի ասեմ, որ ՀԱՊԿ անդամ պետությունների արտաքին գործերի նախարարների խորհրդի նիստը հերթական անգամ կոչ է թե՛ միջազգային հանրությանը և թե՛ մեր հակառակորդին՝ իմանալու, որ հակամարտությունը պետք է լուծվի բանակցային կարգավորման ճանապարհով, իսկ մնացած բոլոր մեթոդները, որոնք այսօր գործնականում կիրառվում են Ադրբեջանի կողմից, միանշանակ անընդունելի է»,-մասնավորապես ասել է Ն. Բաղդասարյանը:
