Ստեփանակերտում ընթանում են արհեստական անհարթությունների կառուցման աշխատանքներ:
Ապահով երթևեկություն իրականացնելու համար Ստեփանակերտում կառուցվում են արհեստական անհարթություններ
ՍՏԵՓԱՆԱԿԵՐՏ, 3 հունիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում ԱՀ ոստիկանության հասարակայնության հետ կապի և լրատվության ծառայության պետ Գառնիկ Ալեքսանյանն ասել է, որ մայրաքաղաքում ապահով երթևեկություն իրականացնելու համար մշտապես նոր մեթոդներ և մոտեցումներ են մշակվում:
Աշխատանքներն սկսվել են մայիսի 9-ից հետո և նախատեսվում է ավարտին հասցնել հունիս ամսվա վերջում:
«Ստեփանակերտում անվտանգ ճանապարհային երթևեկություն կազմակերպելու և ճանապարհատրանսպորտային պատահարներից խուսափելու նպատակով, ինչպես նաև վրաերթերի հնարավոր նվազեցման համար ուսումնասիրության արդյունքում մայրաքաղաքի կենտրոնական, դպրոցամերձ և մանկապարտեզների ճանապարհահատվածներում նախատեսել ենք կառուցել արհեստական անհարթություններ՝ համատեղելով հետիոտնային անցումների հետ, որն իր դրական ազդեցությունը կբերի ճանապարհային երթևեկության կազմակերպման գործում: Արհեստական անհարթությունների կառուցման աշխատանքներն իրականացվում են քաղաքաշինության նախարարության և Ստեփանակերտի քաղաքապետարանի համատեղ նախաձեռնությամբ: Աշխատանքներն ավարտվելուց հետո դրանք կկահավորվեն համապատասխան ճանապարհային նշաններով և գծանշաններով: Ընդհանուր առմամբ, նախատեսված է կառուցել 26 արհեստական անհարթություն: Ի դեպ, մեր տեղեկություններով՝ հանրությունն իր դրական արձագանքն է հայտնել այս հարցում»,- ավելացրել է Գ. Ալեքսանյանը:
Նրա խոսքով՝ Արցախի Հանրապետության Ճանապարհային ոստիկանությունը կձեռնարկի բոլոր հնարավոր քայլերը, որպեսզի մայրաքաղաքում անվտանգ և ապահով երթևեկությունը երաշխավորված լինի:
Մեր զրուցակիցը նշել է, որ մայրաքաղաքի 16 փողոցներում կառուցման աշխատանքներն ավարտվել են, իսկ որոշներում արդեն կան համապատասխան գծանշումները:
