Արցախի գրական ընտանիքը մեծ վիշտ է ապրում Արցախի գրողների միության նահապետ, լրագրող, հրապարակախոս Մաքսիմ Հովհաննիսյանի կորստով:
«Նրա խստակյացության տակ մեղմություն և խորություն կար». Վարդան Հակոբյանը՝ Մաքսիմ Հովհաննիսյանի մասին
ՍՏԵՓԱՆԱԿԵՐՏ, 4 հունիսի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է ԱՀ գրողների միության նախագահ Վարդան Հակոբյանը:
Նրա խոսքով՝ Մ. Հովհաննիսյանն իր ինքնատիպ հետքն է թողել հանրության շրջանում. նա արցախյան հումորը կարողացավ գեղարվեստական խոսքի մեջ զետեղել և ներկայացնել որպես գրականություն:
«Ծանր է այսօր մեր գրական ընտանիքը պատկերացնել առանց Մ. Հովհաննիսյանի: Նա ոչ միայն արձակագիր էր, այլև՝ մեր ժամանակի ճանաչված հրապարակագիր: Նա անուրանալի դերակատարություն է ունեցել նաև արցախյան շարժման ընթացքում. միայն երկու անգամ ստորագրել է Արցախը Հայաստանին միացնելու պատմական դիմում: Նա սկզբունքային մարդ էր՝ թե՛ գրչով և թե՛ իր գործունեությամբ: Մենք պարտավոր ենք այսուհետ ևս արժևորել նրա ստեղծածն ու թողածը: Ցավակցում եմ նրա բոլոր ընթերցողներին, ընտանիքի անդամներին, հարազատներին, ճանաչողներին: Մ. Հովհաննիսյանի անունը դեռ երկար տարիներ կմնա բոլորի սրտերում և հուշերում»,- մասնավորապես ասել է Վ. Հակոբյանը:
Խոսելով Հովհաննիսյանի մարդկային հատկանիշների մասին՝ մեր զրուցակիցը նշել է, որ Մաքսիմը բարի սրտի ու կամքի տեր մարդ էր, նրա խստակյացության տակ մեղմություն և խորություն կար, նրա ստեղծած հարաբերություններն անկեղծ ու անբիծ էին: Նրա հետ աշխատելը, մտերմություն անելը և ընկերանալը պարզապես հաճելի էր:
Հիշեցնենք, որ 2020 թվականի հունիսի 3-ին, կյանքի 87-րդ տարում մահացել է հայ արձակի տաղանդավոր ներկայացուցիչ, հրապարակախոս, լրագրող եւ հանրային գործիչ Մաքսիմ Հովհաննիսյանը:
