ՍՏԵՓԱՆԱԿԵՐՏ, 17 հունիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին նախօրեին Խորհրդարանում կայացած 2019 թ.-ի պետական բյուջեի կատարման տարեկան հաշվետվության քննարկմանն ասել է ԱՀ կրթության, գիտության և մշակույթի նախարար Լուսինե Ղարախանյանը և ավելացրել, որ նախատեսված գումարից ծախսվել է 89 միլիոն 497 հազար 900 դրամ:

Նախարարի խոսքով՝ պետբյուջեի միջոցներով հաշվետու ժամանակաշրջանում շարունակվել են պեղման-ուսումնասիրման աշխատանքները «Տիգրանակերտ» պետական պատմամշակութային արգելոցի տարածքում, Մարտունու շրջանի Բերդաշեն գյուղում, Քաշաթաղի շրջանի Միրիկ գյուղի տարածքում, մասնավորապես՝ Միրիկի ամրոցում: Բարերարների ֆինանսավորմամբ՝ պեղումներ են իրականացվել Մարտունու շրջանի Սոս գյուղի Լուսավորիչ կոչվող տեղամասում:

Պատմամշակութային հուշարձանների ուսումնասիրման ոլորտում իրականացվել են հուշարձանների վկայագրման և պահպանման գոտիների կազմման աշխատանքներ: Ըստ Լ. Ղարախանյանի՝ կազմվել է շուրջ 307 վկայագրեր և 45 պահպանման գոտիներ, որոնց համար համապատասխանաբար ծախսվել է 5 միլիոն և 2 միլիոն դրամ:

Մասնավոր հատվածի կամ բարեգործական հիմնադրամների աջակցությամբ և ֆինանսավորմամբ ավարտվել կամ վերականգնման փուլում են գտնվում Շուշիի «Գոհար աղա» մզկիթի, Հադրութի շրջանի Ծակուռի գյուղի «Ծաղկավանք» եկեղեցու, Մարտակերտի շրջանի Երիցմանկանց վանքի, Մարտունու շրջանի Ամարաս վանքի պարսպապատերի վերականգնման աշխատանքները: Հուշարձանների բարեկարգման աշխատանքների շրջանակներում իրականացվել են «Տիգրանակերտ» պատմամշակութային արգելոցի թանգարանի վերանորոման և Տիգրանակերտի պեղավայրի ցանկապատման աշխատանքները:

Հուշարձանների նախագծա-նախահաշվային փաստաթղթերի մշակման աշխատանքների շրջանակներում կազմվել են Երիցմանկանց վանքի օժանդակ կառույցի, Մարտակերտի շրջանի Առաջաձոր գյուղի սուրբ Աստվածածին եկեղեցու և Շուշիի բերդի 3 աշտարակների ու հարակից պարսպապատերի վերականգնման նախագծա-նախահաշվային փաստաթղթերը:

Պատմամշակութային հուշարձանների պահպանության ծրագրի շրջանակներում 2019 թ.-ին իրականացվել են մի շարք հուշարձանների մաքրման աշխատանքներ: