Խորհրդարանին է ներկայացվել մարդու իրավունքների պաշտպանի գործունեության, մարդու իրավունքների և ազատությունների պաշտպանության մասին տարեկան հաղորդումը
Արցախի Հանրապետության Ազգային ժողովի նախօրեին կայացած արտահերթ նստաշրջանի լիագումար նիստին Մարդու իրավունքների պաշտպան Արտակ Բեգլարյանը ներկայացրել է մարդու իրավունքների պաշտպանի գործունեության, մարդու իրավունքների և ազատությունների պաշտպանության մասին տարեկան հաղորդումը:
Խորհրդարանին է ներկայացվել մարդու իրավունքների պաշտպանի գործունեության, մարդու իրավունքների և ազատությունների պաշտպանության մասին տարեկան հաղորդումը
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ իր խոսքում Արտակ Բեգլարյանն ասել է, որ ՄԻՊ գործունեությունը և դրա արտացոլումը տարեկան հաղորդման մեջ ունեցել է մի քանի հիմնական ուղղություններ: Մասնավորապես՝ առաջին ուղղությունը բողոքների ուսումնասիրությունն ու քննարկումն է, այնուհետև մշտադիտարկման աշխատանքը տարբեր ոլորտներում և տարբեր խոցելի խմբերի իրավունքների պաշտպանության բնագավառներում, հաջորդիվ՝ օրենսդրության կատարելագործումը:
«Սրանք հիմնական գործառույթներն են, որոնք ներկայացված են օրենքով, սակայն, բացի դրանից, կան օրենքից բխող ուղղություններ, որոնք առանձնացնում է ՄԻՊ աշխատակազմը՝ մասնավորապես հանրային իրազեկման աշխատանքները մարդու իրավունքների ուղղությամբ, քաղաքացիական հասարակության զորացման աջակցությունը, միջազգային կապերի ընդլայնումը և արտաքին փոխգործակցության ոլորտը, որի մեջ ընդգրկված են ՀՀ գործընկերների, Սփյուռքի և միջազգային կառույցների հետ համագործակցությունը: Կարևոր ուղղություն է նաև Ադրբեջանի կողմից արցախցիների իրավունքների ու խախտումների սահմանափակումների մշտադիտարկումը և համապատասխան հարթակներում դրանց մասին բարձրաձայնումը»,- մասնավորապես նշել է ԱՀ Մարդու իրավունքների պաշտպանը:
Ա. Բեգլարյանի խոսքով՝ 2019 թ.-ին աշխատանքներ են տարվել նշված բոլոր ուղղություններով և արձանագրված խնդիրները ներկայացվել են տարեկան հաղորդման մեջ: Ամենածավալուն հատվածը, ըստ ՄԻՊ-ի, բողոքների ուսումնասիրությունն ու քննարկումն է, որից բխում է նաև կանխարգելիչ աշխատանքները, քանի որ, բացի անհատական դեպքերից, երբեմն լինում են նաև այնպիսի խնդիրներ, որոնք առկա են կամ օրենսդրության մեջ, կամ էլ գործնականում:
Ընդհանուր առմամբ, 2019 թ.-ին ՄԻՊ աշխատակազմը ստացել է 234 դիմում՝ 378 անձանց կողմից, որից 126-ը՝ բանավոր, իսկ 105-ը՝ գրավոր, 3-ը՝ այլ(օրինակ՝ ազատազրկված անձը դիմում է ներկայացրել Մարդու իրավունքների պաշտպանին հանդիպելո խնդրանքով և այլն): Բողոքների ուսումնասիրության քննարկման և կանխարգելիչ աշխատանքների հիման վրա Մարդու իրավունքների պաշտպանի կողմից ներկայացվել են մոտ 100 առաջարկներ, որոնք կառույցը ակնկալում է, որ կատար կածվեն:
Տարեկան հաղորդման ներկայացումից հետո Ա. Բեգլարյանը պատասխանել է պատգամավորների առաջադրած հարցերին: