Արցախյան «Նախշուն թեյ» անվամբ բուսական նոր թեյն արտադրվում է 2020 թվականի մարտից, Ասկերանում:
Արցախյան նոր թեյատեսակն արդեն վաճառքում է
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում համանուն ընկերության հիմնադիր տնօրեն Դավիթ Գաբրիելյանն ասել է, որ թեյարտադրությամբ զբաղվելու մտահղացումն իր մոտ առաջացել է մի քանի տարի առաջ, բայց հիմնական աշխատանքները մեկնարկել են Նոր տիպի կորոնավիրուսի տարածման շրջանում:
Նրա խոսքով՝ թեյի անվան ընտրության հարցում ունեին երեք տարբերակ՝ «Արցախ թեյ», «Սաթի թեյ»՝ նախատատի անունով, ով հենց զբաղվում էր խոտաբույսերով, և «Նախշուն թեյ»: Բրենդի անվանումն ընտրել են՝ սոցիալական ցանցերում երեք տարբերակները քվեարկության դնելով: 
«Թեյերի պատրաստման համար օգտագործում ենք արցախյան և հայաստանյան ֆլորայի հիմնական բույսերը, որոնք հավաքում ենք ընտանիքով: Նախապատվությունը տալիս ենք լեռնային և նախալեռնային գոտիներում աճող բույսերին: Մենք մինչև բույսերի հավաքման փուլը նախ ուսումնասիրել ենք բոլոր խոտաբույսերի հատկությունները: Թեյերը պատրաստ լինելուց հետո մի քանի նմուշ ուղարկել ենք հայաստանյան փորձառու մասնագետներին, ովքեր ստուգել են դրանց բաղադրությունը, բույսերի համատեղելիությունը և այլն, որից հետո, շտկելով թերությունները, դրանք հանել ենք շուկա: Բույսերը չորացնում ենք հատուկ՝ ոչ էլեկտրական չորանոցներում՝ այդ կերպ պահպանելով բուսատեսակների օգտակար հատկությունները: Ի դեպ, երկու շաբաթ է, ինչ թեյերը վաճառվում են արցախյան շուկայում: Մեր արտադրանքն մնացած բուսական թեյերից տարբերվում է բաղադրությամբ. յուրաքանչյուր թեյի համար օգտագործում ենք 5-6 տեսակի խոտաբույսեր, որոնք ունեն օգտակար հատկություններ: Տուփի մեջ լինում է 20 գրամ չոր զանգված. շուտով կունենաք նաև մեծ տուփեր՝ 50գ և ավելի տարողությամբ»,- մասնավորապես ասել է Դ. Գաբրիելյանը: 
Նա նշել է, որ «Նախշուն թեյ»-ի պահանջարկը գնալով աճում է, իսկ վաճառքն իրականացվում է հիմնականում սոցիալական ցանցերի «Նախշուն թեյ» էջի միջոցով:
