Հուլիսի 1-ի դրությամբ հանրապետությունում հնձվել է 45 հազար 687 հա ցանքատարածք, որից 34 հազար 205 հա-ը՝ գարու և 11 հազար 482 հա-ը՝ ցորենի:
Հանրապետությունում շարունակվում են բերքահավաքի աշխատանքները. ցուցանիշները գոհացուցիչ չեն
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ գյուղատնտեսության փոխնախարար Վիլեն Ավետիսյանը:
Նրա խոսքով՝ համախառը բերքը կազմել է 58 հազար 521 տ, որից 41 հազար 839,5 տ գարի և 16 հազար 681,5 տ ցորեն: Միջին բերքատվությունը հա-ից կազմել է 12,8 ց:
«Բերքահավաքի աշխատանքներին ներգրավված է 202 կոմբայն, որից 47-ը՝ Մայր հայրենիքից: Նախորդ տարվա համեմատ՝ ցուցանիշները ցածր են. պատճառը եղանակային անբարենպաստ պայմաններն են և ագրոկանոնների ոչ ճիշտ կիրառումը: Ի դեպ, ունենք հողօգտագործողներ, ովքեր պահպանել են ագրոմշակության կանոնները և արդյունքում ստացել որակյալ բերք»,- մասնավորպես ավելացրել է Վ. Ավետիսյանը:
