Իրանի կառավարության խոսնակ Ալի Ռաբիեին իրանական «Նաթանզե» միջուկային օբյեկտում տեղի ունեցած պայթյունից հետո միջազգային հանրությանը կոչ է արել գործողություններ իրականացնել ընդդեմ Իսրայելի, որին մեղադրում են պայթյունը կազմակերպելու համար:
«Միջազգային հանրությունը պետք է պատասխանի Իսրայելին Իրանի միջուկային օբյեկտում կազմակերպած պայթյունի համար». Իրան
ՍՏԵՓԱՆԱԿԵՐՏ, 8 հուլիսի, ԱՐՑԱԽՊՐԵՍ: Այս մասին հայտնում է Tert.am-ը։
«Իսրայելի կողմից օգտագործվող այս մեթոդը վտանգավոր է և կարող է տարածվել աշխարհի ցանկացած կետում: Միջազգային հանրությունը պետք է արձագանքի և սահմանափակի սիոնիստական ռեժիմի այդ գործողությունները»,-ասել է Ռաբիեին:
Խոսնակի մեկնաբանությունները հնչել են նրանից հետո, երբ հուլիսի 6-ին Իրանի իշխանությունները խոստովանել էին, որ ցենտրիֆուգեր արտադրող «Նաթանզե» միջուկային օբյեկտում տեղի ունեցած պայթյունը դժբախտ պատահար չի եղել: Իսրայելական հեռուստաընկերություններն առանց հղումների նշել են, որ պայթյունը ոչնչացրել է լաբորատորիան, որտեղ արտադրվում էին ամենաարագ ցենտրիֆուգերը` այդպիսով Իրանի միջուկային ծրագիրը դանդաղեցնելով 1-2 տարով:
Nour News լրատվականը, որը համարվում է Իրանի Ազգային անվտանգության բարձրագույն խորհրդի լրատվամիջոցը, գրել է, որ Իրանի զգայուն օբյեկտներում խորհրդավոր աղետների շարքի ֆոնին տեղի ունեցած այս պայթյունը նմանություն է ունեցել երկրի անվտանգությանը հասցված այլ հարվածների հետ:
The Washington Post և New York Times պարբերականները այս շաբաթվա սկզբում մեջբերել էին մերձարևելյան երկրների պաշտոնյաներին, որոնք հայտարարել էին, որ «Նաթանզե»-ում տեղի ունեցած պայթյունն իսրայելցի օպերատիվ հետախույզների կողմից տեղադրված ռումբի հետևանք է եղել:
Պաշտոնյաներից մեկը նշել է, որ այս պայթյունը ծրագրված ահազանգ էր Իրանի համար և նպատակ ուներ զսպելու Իրանի միջուկային ձեռքբերումները, այն կատարվել է մարդկանց կողմից, որոնք խորապես տեղյակ էին երկրի միջուկային ծրագրից:
«Դրա համար լուրջ պատրաստություն և ժամանակ է հարկավոր»,-նշել է պաշտոնյան:
Իսրայելը դիվերսիա է իրականացրել` իրանական «Նաթանզե» միջուկային օբյեկտում պայթուցիկ սարք գործի դնելով: