ԱՀ պետական բյուջեի միջոցներով Ասկերանի շրջանի Խնապատ համայնքում սկսվել են նոր ջրագծի կառուցման աշխատանքները:
Խնապատում նոր ջրագիծ է կառուցվում. hամայնքում ջրի խնդիրն օրհասական է
ՍՏԵՓԱՆԱԿԵՐՏ, 9 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Խնապատի համայնքի ղեկավար Սամվել Շահրամանյանը:
Նրա խոսքով՝ արդեն երեք տարի է, ինչ գյուղն ունի ջրի խնդիր. ցամաքել են աղբյուրները: Պատճառը երաշտն է:
«Ամռան այս օրերին ջուր չլինելու պատճառով գյուղի բնակիչները լուրջ խնդրի առաջ են կանգնել։ Ունենք թաղամասեր, որտեղ բնակիչներն ընդհանրապես ջուր չեն ստնում։ Ամսվա ընթացքում երեք օր 1-2 ժամով ջուր ենք ստանում, որը, բնականաբար, մանավանդ այս շրջանում շատ քիչ է օգտագործման համար: Արդեն 10 օր է, ինչ արտակարգ իրավիճակների պետական ծառայության տնօրեն, գնդապետ Կարեն Սարգսյանի հանձնարարությամբ Ասկերանի շրջանային արտակարգ իրավիճակների բաժինն ամենօրյա ռեժիմով՝ օրական երկու անգամ, խմելու, կենցաղում օգտագործելու և տնամերձ տարածքները ոռոգելու նպատակով ջուր է մատակարարում մեր համայնքի բնակչությանը: Բայց դա հարցի ժամանակավոր լուծում է՝ չնայած, որ ԱԻՊ ծառայության կողմից աջակցությունը կշարունակվի, մինչև ջրամատակարարման հարցն այստեղ կլուծվի ամբողջությամբ։ Հուսով ենք՝ նոր ջրագծի կառուցման աշխատանքներն ավարտելուց հետո Խնապատի բնակիչները նման խնդիր չեն ունենա»,-ավելացրել է համայնքի ղեկավարը:
