Տիգրանակերտում և Մարտունու շրջանի Սոս գյուղի «Լուսավորիչ» տեղամասում ընթանում են պեղման աշխատանքներ:
Պատմամշակութային վայրերում իրականացվում են ուսումնասիրություններ և շրջայցեր
ՍՏԵՓԱՆԱԿԵՐՏ, 10 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Պատմական միջավայրի պահպանության պետական ծառայություն» ՊՈԱԿ-ի տնօրեն Արմինե Հայրապետյանը՝ տեղեկացնելով, որ, հաշվի առնելով Նոր տիպի կորոնավիրուսի տարածումը՝ ստիպված են եղել հրաժարվել որոշ ծրագրերից կամ էլ դրանք հետաձգել: 
Խոսելով ՊՈԱԿ-ի կողմից իրականացվող աշխատանքների մասին՝ Ա. Հայրապետյանն ասել է, որ տարբեր պատմամշակութային վայրերում կազմակերպում են ուսումնասիրություններ և շրջայցեր: Ի դեպ, ուսումնասիրությունների ընթցաքում ի հայտ են բերել նոր խաչքար, որը մինչև հիմա դեռևս ներառված չէ պետական ցուցակում: 
«Մարտակերտի շրջանի Կիչանի «Անապատ» կոչվող (Խութավանք) եկեղեցու շրջակայքում արձանագիր քար է հայտնաբերվել, որը 1989 թվականին թուրքերից թաքցրել էր Կիչանի բնակիչ Մանվել Միքայելյանը: Վերջերս նա դիմել էր մեզ՝ որպեսզի թաքստոցից հանվի քարը: Մեր ծրագրերի ընթացքում՝ մաքրման աշխատանքներ են իրականացվել Բովուխանի վանքում, Մոշխմհատ գյուղի մոտ «Ղոնդիկի» վանական համալիրում, Մոխրենեսի «Օխտը դռնի վանք»-ում: Ամեն տարի մաքրման աշխատանքներին մեզ օգնում են դպրոցականները, հասարակական տարբեր կազմակերպությունների անդամներ, այս տարի հաշվի առնելով Նոր տիպի կորոնավիրուսի տարածման վտանգը՝ նրանք չենք ներգրավվել ծրագրին: Հուսով ենք՝ կհաղթահարենք համավարակը և կհամագործակցենք բոլորի հետ»,-մասնավորապես ասել է Ա. Հայրապետյանը:
Նրա խոսքով՝ համավարակի շրջանում Արցախում զարգացել է ներքին տուրիզմը: Շրջայցերի ժամանակ՝ պատմամշակութային վայրերում նկատելի է կենցաղային աղբի մեծ ծավալ, ինչն անթույլատրելի և ցավալի է:
«Կոչ ենք անում բոլորին՝ լինել սրտացավ և բնության գրկում պահպանել մաքրություն:Նշեմ, որ մեր կառույցի աշխատակիցները կամավորների հետ համատեղ առաջիկա օրերին «Հունոտի կիրճ»-ում կազմակերպելու է շաբաթօրյակ»,- ավելացրել է մեր զրուցակիցը:
