ՍՏԵՓԱՆԱԿԵՐՏ, 14 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ասուլիսին Օֆելյա Հարությունյանն անդրադարձել է նոր կորոնավիրուսի դեմ պայքարի հակահամաճարակային միջացառումներին, հաստատված դեպքերին և հիվանդացության դեպքերի արցախյան, հայաստանյան ու միջազգային վիճակագրությանը:

Նոր տիպի կորոնավիրուսի (COVID-19) համավարակն աշխարհին հայտնի է դարձել 2019 թվականի դեկտեմբերին: Առաջին դեպքը գրանցվել է Չինաստանի Ուհան քաղաքում: Արդեն 2020 թվականին ամբողջ աշխարհում հայտարարվել է կորոնավիրուսի պանդեմիա: Արցախում կորոնավիրուսային հիվանդության առաջին դեպքը գրանցվել է ընթացիկ տարվա ապրիլի 7-ին:

Անդրադառնալով Արցախում գրանցված դեպքերին՝ ոլորտի պատասխանատուն նշել է, որ այսօրվա դրությամբ, ընդհանուր առմամբ, հաստատվել է 153 դեպք: Փաստացի բուժում է ստանում 29 հիվանդ, որից 9-ը ունեն ուղեկցող հիվանդություններ: Ի դեպ, ասիպտոմ հիվանդների բուժումը կազմակերպվում է Ստեփանակերտի և Շուշիի հյուրանոցային համալիրներում, իսկ վարակակիրների հետ շփում ունեցած կոնտակտավորները և մեկուսացված քաղաքացիները գտնվում են Շուշիի մեկ այլ հյուրանոցային համալիրում:

Օ. Հարությունյանի խոսքով՝ կորոնավիրուսով վարակված և ուղեկցող հիվանդություն ունեցող 9 հիվանդների բուժումը կազմակերպվում է Ստեփանակերտի Հանրապետական բժշկական կենտրոնում: 2 հիվանդի վիճակը գնահատվում է ծանր, մնացածինը՝ բավարար:

Հիվանդների և մեկուսացվածների հետ տարվում են բացատրական աշխատանքներ, որը, ըստ Օ. Հարությունյանի, շատ կարևոր է, քանի որ նրանք պետք է հաշվի առնեն, որ կարող են վարակի աղբյուր հանդիսանալ այլ քաղաքացիների համար:

«Ընդհանուր առմամբ, իրավիճակը գտնվում է վերահսկողության տակ: Ինչ վերաբերում է վերջին մի քանի օրերին Ստեփանակերտում գրանցված վարակի նոր օջախներին, նշեմ, որ հիմնականում վարակի օջախ են հանդիսանում վարակակրի ընտանիքի անդամները: Այսինքն՝ եթե որևէ քաղաքացու մոտ հաստատվում է կորոնավիրուսային հիվանդությունը, բնականաբար, ընտանիքի մյուս անդամները հանդիսանում են կոնտակտավորներ»,- ավելացրել է Օ. Հարությունյանը:

Ոլորտի պատասխանատուն, ըստ շրջանների, ներկայացրել է գրանցված դեպքերի թիվը, մասնավորապես՝ Ստեփանակերտում գրանցվել է 65, Շահումյանի շրջանում՝ 34, Հադրութի շրջանում՝ 29, Մարտակերտի շրջանում՝ 12, Շուշիի շրջանում՝ 6, Մարտունու շրջանում՝ 3, Քաշաթաղի շրջանում՝ 3 և Ասկերանի շրջանում՝ 1 դեպք: