Ինչպես հաղորդում է Интерфакс-ը, ամերիկյան դոլարի փոխարժեքը ռուբլու նկատմամբ սեպտեմբերի 25-ին՝ Երևանի ժամանակով 20:00-ի դրությամբ, կազմել է 78,41 ռուբլի, որը 1,27 ռուբլիով ավելի է նախորդ օրվա փոխարժեքից: Ընդ որում, դոլարը ապրիլի 2-ից ի վեր առաջին անգամ վաճառվում է 78 ռուբլուց ավելի արժեքով:

Եվրոյի փոխարժեքն աճել է 1,08-ով՝ կազմելով 91,13 ռուբլի, եվրոպական արտարժույթը 2016թ. փետրվարի 11-ից ի վեր առաջին անգամ վաճառվում է ավելի քան 91 ռուբլիով:

Աղբյուրի փոխանցմամբ՝ ռուբլու շարունակական արժեզրկումը մի քանի պատճառ ունի. ակտիվների շուկաներից միջազգային բազմաթիվ ներդրողներ դուրս են գալիս՝ մտավախություններ ունենալով, որ կորոնավիրուսի երկրորդ ալիքի պայմաններում համաշխարհային տնտեսության վերականգնման տեմպերը դանդաղելու են, մյուս կողմից՝ բացասաբար են ազդում նաև արտաքին պատժամիջոցները:

Բացի այդ, բացասկաբար են ազդում նաև Forex շուկայում դոլարի զանգվածային գնումները, նավթի գների էական անկումն ու սեպտեմբերին հարկային շրջանի ավարտվելը: