Այս պահի դրությամբ շարունակվում են մարտական գործողությունները հյուսիսային, հարավային և հարավ-արևելյան ուղղություններով:
Հակառակորդն ունի 47 զրահատեխնիկայի, 36 ԱԹՍ-ի և 400-ից ավելի մարդկային կորուստ. ՊԲ նախարարի տեղակալը ներկայացրել է մարտական իրադրությունը (Տեսանյութ)
ՍՏԵՓԱՆԱԿԵՐՏ, 28 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին «Արցախ Տեղեկատվական շտաբ»-ում քիչ առաջ կայացած բրիֆինգի ժամանակ ասել է ԱՀ Պաշտպանության բանակի նախարարի տեղակալ, գնդապետ Արթուր Սարգսյանը:
Նրա խոսքով՝ մարտական գործողությունների վարման ինտենսիվությունն ու բարձր դինամիկան պահպանվում է ժամանակակից համազորային մարտին բնորոշ, իսկ ժամ առ ժամ նաև ավելանում է:
«Նշված ուղղություններում ՊԲ ստորաբաժանումները մղում են պաշտպանական համառ մարտեր՝ կասեցնելով հակառակորդի գերազանցող ուժերի, այդ թվում նաև մեծաքանակ, խոշոր, զրահատանկային խմբավորումների առաջխաղացման փորձերը և պատճառելով նրանց կենդանի ուժի և զրահատեխնիկայի զգալի կորուստներ»,- նշել է Ա. Սարգսյանը:
ՊԲ նախարարի տեղակալը հայտնել է, որ այսօրվա դրությամբ՝ ժամը 17:00-ի սահմաններում արձանագրվել է հակառակորդի հետևյալ կորուստները՝ շուրջ 36 ԱԹՍ, 47 զրահատեխնիկա և 400-ից ավել անվերադարձ կորուստ անձնակազմի մոտ: Նախնական տվյալներով ՊԲ ստորաբաժանումներն ունեն 48 զոհ և 200-ից ավել վիրավոր զինծառայողներ:
«Խորապես ցավակցում ենք բոլոր զոհվածների ընտանիքի անդամներին և հարազատներին, իսկ վիրավորներին մաղթում շուտափույթ ապաքինում: Երկօրյա համառ մարտերը, բնավ, չեն ընկճել մեր անձնակազմին, ընդհակառակը այդպիսով արցախյան բանակի երիտասարդ սպաները և զինվորները ձեռք են բերում մարտական գործողությունների վարման հարուստ փորձ և հմտորեն տիրապետում են մարտավարական նոր հնարքների: Անձնակազմի մարտական ոգին բարձր է և պատրաստ է կատարելու հետագա առաջադրված բոլոր խնդիրները ու հասցնելու իր տրամաբանական հաղթանակին: Մենք ուժեղ ենք, քան երբևիցե, քանի որ մեզանից յուրաքանչյուրը գիտակցում է, որ նժարին դրված է հայ ժողովրդի արցախյան հատվածի ֆիզիկական գոյության հարցը»,- ավելացրել է Ա. Սարգսյանը:
