Ադրբեջանական իշխանությունները և քարոզչամեքենան վերջին օրերին սկսել են ակտիվորեն թեզեր տարածել հայերի հանդեպ դրական վերաբերմունքի, համատեղ ապրելու հնարավորությունների, Արցախը Ադրբեջանի կազմում տեսնելու առումներով, որոնք ուղղակի քմծիծաղ են առաջացնում, քանի որ նախ՝ Արցախի ապագան որոշում է բացառապես Արցախի բնակչությունը՝ ողջ հայ ժողովրդի աջակցությամբ, և բացի դրանից, մենք ենք Արցախի Հանրապետության տերը ու մեր հայրենիքի ճակատագրի որոշողը:
Որևէ խոսք լինել չի կարող Ադրբեջանի կազմում ապրելու մասին. Արտակ Բեգլարյան
ՍՏԵՓԱՆԱԿԵՐՏ, 24 հոկտեմբերի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ այս մասին այսօր կայացած ճեպազրույցի ժամանակ ասել է ԱՀ Մարդու իրավունքների պաշտպան Արտակ Բեգլարյանը:
«Հետևաբար որևէ խոսք լինել չի կարող Ադրբեջանի կազմում ապրելու մասին, քանի որ առաջնահերթ մենք ունենք բացառիկ իրավունքներ մեր հայրենիքում ապրելու համար: Տասնամյակներ շարունակ ադրբեջանական իշխանությունները վարել են այնպիսի քաղաքականություն, որը խորացրել է իրենց հասարակության մեջ հայերի ատելության մակարդակը և ուղղակի անհնար է դարձրել երկու ժողովուրդների համատեղ գոյակցությունը որևէ տեսանելի ապագայում»,- ընդգծել է Մարդու իրավունքների պաշտպանը:
Ա. Բեգլարյանը կարծում է, որ դրա վառ ապացույցն այս պատերազմի ընթացքում դրսևորված ատելության մեծ ալիքն է հայերի հանդեպ:
Ըստ ՄԻՊ-ի՝ օր առաջ պետք է դադարեցնել ատելության քարոզը, և այս ամենի մասին պետք է մտածի նաև միջազգային հանրությունը, քանի որ պատասխանատվություն է կրում այս ամենի համար:
