ԱրՊՀ ակ. Ս. Աբրահամյանի անվան հայոց լեզվի ամբիոնի դասախոսները բաց նամակով դիմել են Արցախի Հանրապետության Ազգային ժողովի պատգամավորներին «Լեզվի մասին օրենքում փոփոխություններ և լրացումներ կատարելու մասին» ԱՀ օրենքի նախագծի կապակցությամբ:
Արցախում պաշտոնական լեզվի կարգավիճակ վերապահել միայն պետական լեզվին, իսկ ռուսերենը ընդունել որպես աշխատանքային լեզու. ԱրՊՀ հայոց լեզվի ամբիոնի դասախոսները բաց նամակով դիմել են պատգամավորներին
ՍՏԵՓԱՆԱԿԵՐՏ, 2 Մարտի, ԱՐՑԱԽՊՐԵՍ։ Բաց նամակը տարածվել է Ֆեյսբուք սոցիալական կայքում՝ ամբիոնի դասախոս Շողեր Մինասյանի էջից:
«Յուրաքանչյուր արժանապատիվ ժողովրդի ինքնության հավիտենությունը պայմանավորված է սեփական լեզվի պաշտամունքով: Ամեն ազգի բարոյական նկարագիրը չափվում է մայրենի լեզվի նկատմամբ ունեցած վերաբերմունքով:Ազգի յուրաքանչյուր զավակ պարտավոր է իրեն համարել մայրենի լեզվի տերը և պաշտպանել նրա իրավունքները: Եթե նկատի առնենք պատմական այս ծանր իրողությունը, ապա պիտի ընդունենք, որ հայերենն է, որ պիտի պահի մեր հայի տեսակը, որպեսզի կարողանանք դիմագրավել մարտահրավերներին: Հայոց լեզուն հավասարեցնել այլ լեզվի նշանակում է կորցնել ազգային կերպարն ու պետականությունը:Լեզվի դեմ ոտնձգությունը ոտնձգություն է մեր ինքնության դեմ, սպառնալիք ներկայի ու ապագայի հանդեպ:Դարի մարտահրավերների առջև կանգնած այսօրվա սերունդը պետք է լինի ազգային ավանդույթներին հավատարիմ, իսկ մենք գիտենք, որ լեզվամտածողությունն է ձևավորում ազգային բնավորություն: Այսօր տեսնում ենք և վաղն էլ կփաստենք հայի մի ստվար զանգվածի, որ հայախոս չէ. լեզուն պահպանելու խնդիր կունենանք( հիշենք խորհրդային տարիները):
Ազգային ժողովի´ պատգամավորներ, մեր դիրքորոշումը լեզվական քաղաքականության հարցում բնավ չի նշանակում Արցախում օտար լեզուների հանդեպ որևէ խտրականության դրսևորում:Մենք լիովին հասկանում ենք մեր ներկայիս անվտանգության համակարգի առանձնահատկություններով պայմանավորված քաղաքական այն յուրահատուկ վիճակը, որում հայտնվել ենք անցյալ տարվա աղետալի պատերազմի հետևանքով: Եվ մեր առաջարկը բխում է նաև այն ընկալումից, որ գալիք արհավիրքներից պաշտպանվելու գլխավոր զենքերից մեկը սեփական լեզվի գերակայությունն է:
ԱրՊՀ ակ. Ս. Աբրահամյանի անվան հայոց լեզվի ամբիոնի դասախոսներս և աշխատակիցներս դիմում ենք հետևյալ պահանջով` Արցախում պաշտոնական լեզվի կարգավիճակ վերապահել միայն պետական լեզվին, այսինքն`հայոց լեզվին: Հայոց լեզվի գերակայությունը բոլորիս պարտքն է, արցախահայության գոյապահպանության հիմնաքարը: Կարելի է ձևակերպել, որ ռուսերենը ԱՀ տարածքում ազգամիջյան հաղորդակցության լեզու է: Առաջարկում ենք ռուսերենը ընդունել որպես աշխատանքային լեզու, որը կարող է գործածվել պետական և այլ հաստատություններում»,-ասված է նամակում:
