Heritage հիմնադրամի կազմած «Տնտեսական ազատության ցուցիչ 2021» զեկույցում Հայաստանը բարելավել է դիրքերը է 1,3 միավորով և զբաղեցրել 32-րդ հորիզոնականը` դասվելով առավելապես ազատ երկրների շարքին։
Հայաստանը «Տնտեսական ազատության ցուցիչ 2021» զեկույցում դասվել է առավելապես ազատ երկրների շարքին
ՍՏԵՓԱՆԱԿԵՐՏ, 5 Մարտի, ԱՐՑԱԽՊՐԵՍ: «Ընդհանուր առմամբ, երկրի տնտեսական ազատության միավորը 71,9 է, որը 2021 թվականի զեկույցում Հայաստանի տնտեսությունը դարձնում է 32-րդը: Հայաստանը Եվրոպայի տարածաշրջանի 45 երկրների շարքում 18-րդն է»,- tert.am-ի փոխանցմամբ՝ ասվում է հիմնադրամի կողմից հրապարակված զեկույցում։
Հայաստանի համար ամենացածր միավորները գրանցվել են հետևյալ ցուցանիշներում՝ սեփականության իրավունք (57,3 միավոր), դատական արդյունավետություն (55,3 միավոր) և կառավարության ամբողջականություն (45.0 միավոր):
Երկիրն ամենաբարձր ցուցանիշն է գրանցել հարկային բեռի (87,1 միավոր) և ֆիսկալ առողջապահության (84,3 միավոր) ոլորտներում։
Տնտեսական ազատության ցուցիչը կազմվում է ըստ 12 ցուցանիշների, որոնք բաժանված են չորս ենթաբաժինների՝ օրենդրական արդյունավետություն, կարգավորման արդյունավետություն, կառավարության գործունեություն և բաց շուկայականություն։
Նշենք՝ վարկանիշային աղյուսակում Ռուսաստանը զբաղեցրել է 92-րդ, Թուրքիան ՝ 76-րդ, Իրանը՝ 168-րդ, Վրաստանը՝ 12-րդ, իսկ Ադրբեջանը՝ 38-րդ հորիզոնականը։
Երկրորդ տարին անընդմեջ վարկանիշային աղյուսակի առաջին տեղը զբաղեցրել է Սինգապուրը՝ 100,7 հնարավորից 89,7 միավորով: Երեք առաջատարների թվում են նաև Նոր Զելանդիան (83,9 միավոր) և Ավստրալիան (82,4 միավոր): Առաջին հնգյակում ընդգրկված են նաև Շվեյցարիան և Իռլանդիան:
Հյուսիսային Կորեան և Վենեսուելան փակել են վարկանիշային աղյուսակը՝ հավաքելով նվազագույն միավորները։
Առաջին անգամ Հոնկոնգը չի ընդգրկվել տնտեսական ազատության վարկանիշում, որը 25 տարի շարունակ գլխավորել է այն և միայն անցյալ տարի է զիջել իր դիրքերը Սինգապուրին:
«Այս տարի ցանկում ընդգրկվել են այն անկախ երկրների տնտեսությունները, որտեղ կառավարությունները ինքնիշխան վերահսկողություն են իրականացնում տնտեսական քաղաքականության նկատմամբ: Այսպիսով, Հոնկոնգն ու Մակաոն դուրս են մնացել ցուցակից», - պարզաբանել են զեկույցի հեղինակները:
Հիշեցնենք՝ վարկանիշային զեկույցը հրապարակվում է 1995 թվականից: Առավելագույն ցուցանիշը, որը կարող է շնորհվել երկրին, 100-ն է։ Այս միավորը խոսում է տնտեսական բացարձակ ազատության մասին, իսկ նվազագույնը, համապատասխանաբար 0-ն է, որը տրվում է այն երկրներին, որտեղ տնտեսական ազատությունը բացակայում է։
Վարկանշային աղյուսակում ընդգրկված բոլոր երկրները բաժանված են հինգ ենթաբաժինների՝ «ազատ», «հիմնականում ազատ», «չափավոր ազատ», «հիմնականում ոչ ազատ» և «ոչ ազատ»:
80-ից 100 ցուցանիշ ունեցող երկրները ստանում են «ազատ» տնտեսական մակարդակ, 70-ից 79,9 ցուցանիշ ունեցող երկրները`«գերակշռող ազատ», 60-ից 69,9` «չափավոր ազատ», 50-ից 59,9` «հիմնականում ոչ ազատ», 49.9-ից և ցածրի դեպքում`«ոչ ազատ»:
