Այսօր՝ ապրիլի 24-ին, Ստեփանակերտում հարյուրավոր քաղաքացիներ իրենց հարգանքի տուրքն են մատուցել 1915 թվականի Հայոց Ցեղասպանության անմեղ զեհերի հիշատակին՝ ծաղիկներ խոնարհելով Ստեփանակերտում մեծ եղեռնի զոհերի հիշատակը հավերժացնող «Զանգակատուն» հուշակոթողին։
Ստեփանակերտում հարգանքի տուրք են մատուցել Հայոց ցեղասպանության զոհերի հիշատակին (լուսանկարներ)
ՍՏԵՓԱՆԱԿԵՐՏ, 24 ապրիլի, ԱՐՑԱԽՊՐԵՍԵ: «Արցախպրես»-ի թղթակցի հաղորդմամբ՝ «Զանգակատուն» հուշակոթող են այցելել ԱՀ Ազգային ժողովի նախագահ Արթուր Թովմասյանը, ԱՀ անվտանգության խորհրդի քարտուղար Վիտալի Բալասանյանը, Արցախի թեմի առաջնորդ Տեր Վրթանես եպիսկոպոս Աբրահամյանը, պատգամավորներ, տարբեր գերատեսչությունների ներկայացուցիչներ, դպրոցականներ և այլք:
Հուշակոթողին ծաղիկներ խոնարհելուց հետո ներկաները քաղաքային հուշահամալիրում այցելել են նաև արցախյան երրորդ պատերազմի ժամանակ զոհվածների գերեզմաններին։
Իր հարգանքի տուրքը մատուցած քաղաքացի Հարություն Ասլանյանը լրագրոողների հետ ճեպազրույցում չկարողացավ թաքցնել հուզմունքը։ «Նայում եմ բարձունքներին , որտեղ զոհվել են մեր հերոսները, և որտեղ թուրքը մեր հողի մի պատառիկը խլեց: Ես այսօր լսում եմ Դանիել Վարուժանի, Սիամանթոյի, Ռուբեն Սևակի ձայնը: Ցավում և ողբում եմ, բայց նաև հույսով ու հավատով վաղվա օրվան եմ սպասում , որ Աստված կպատժի հայոց թշնամիներին: Պիտի ապրենք միասնաբար, արդար, ազնիվ, սիրենք զմիմյանս»,֊ ասաց նա։
Արցախյան երրորդ պատերազմի մասնակից, վիրավորում ստացած Գևորգ Միրզոյանը, խոսելով հայոց ցեղասպանության մասին, մեզ հետ զրույցում նշեց, որ 2020 թվականի պատերազմը ևս ցեղասպանություն էր հայ ժողովրդի նկատմամբ:
