«Արցախի ներկան և ապագան» խորագրով հանդիպումների շրջանակում այսօր՝ ապրիլի 29-ին, Արցախի պետական համալսարանում բուհի պրոֆեսորադասախոսական կազմի և ուսանողների հետ հանդիպել է ԱՀ Ազգային ժողովի նախկին նախագահ Աշոտ Ղուլյանը:
Արցախը պետք է լինի համահայկական պետականության առանցքում. Աշոտ Ղուլյան
ՍՏԵՓԱՆԱԿԵՐՏ, 29 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ հանդիպմանն ԱրՊՀ ռեկտոր Արմեն Սարգսյանը ողջունել է նման ձևաչափով հանդիպումները քաղաքական գործիչների հետ:
Ռեկտորը Ա. Ղուլյանին պարգևատրել է բուհի 50-ամյա գործունեությանը նվիրված մեդալով:
Այնուհետև Աշոտ Ղուլյանն իր ելույթում անդրադարձել է Արցախյան հիմնախնդրին՝ ներկայացրել անելիքների, սպառնալիքների, նոր մարտահրավերների մասին իր անձնական տեսակետը:
Նրա խոսքով՝ պետք է քաղաքական ճիշտ մշակույթ ձևավորել՝ զերծ մնալով ծայրահեղություններից:
Այն հարցին, թե ինչ է փոխվել արցախցիների կյանքում, Ա. Ղուլյանը նշել է, որ ամեն ինչ՝ սկսած տրամադրությունից:
«Մեծ հաշվով՝ փոխվել է անվտանգության այն միջավայրը, որում մենք գտնվում էինք մինչև 2020 թվակնի սեպտեմբերի 27-ը: 44-օրյա պատերազմի արդյունքում կարծես թե ռազմաքաղաքական, տեխնիկական առումներով ունեցանք մի քանի անսպասելի զարգացումներ»,- ավելացրել է Ա. Ղուլյանը:
Բանախոսն իր ելույթում առանձնացրել է այն կետերը, որոնք մտահոգիչ է համարում հանրության համար. առաջինը հայրենիքի պաշտպանությունն է՝ Արցախում ապրող մարդկանց անվտանգությունը, բարեկեցության, խաղաղության ապահովումը՝ առաջնահերթ սեփական ուժերով և հայոց հզոր բանակով:
Ըստ Ա. Ղուլյանի՝ Արցախը պետք է լինի համահայկական պետականության առանցքում. համազգային բոլոր միջոցառումների կենտրոնը պետք է դառնա Արցախ աշխարհը:
Խոսելով սպառնալիքների մասին՝ ԱՀ ԱԺ նախկին նախագահը նշել է, որ առաջին խնդիրը պատերազմի վերսկսման հավանականությունն է, քանի որ թշնամին թուրքն է, ում երբեք չպետք է վստահել: Պատերազմը միայն ռազմադաշտում չէ, այն ամենուր է: Ա. Ղուլյանն իր խոսքում մասնավորապես առանձնացրել է այն կետերը, որոնք լուրջ սպառնալիքներ են. «Արցախի անորոշ կարգավիճակը պետք է հստակեցվի: Թուրքիայի և Ադրբեջանի դիրքերի ապահովը տարածաշրջանում լուրջ մտածելու առիթ է բոլորիս համար: Ահաբեկիչների ներկայությունը ևս մեծ սպառնալիք է, և պետք է հակաահաբեկչական քայլեր ձեռնարկել: Արցախն ունի լուրջ դաշնակիցների կարիք: Պատերազմի արդյունքում մենք հասկացանք, որ տեխնոլոգիական և գիտական պատրաստվածության մակարդակը ցածր է: Մենք այսօր ունենք ոչ պրոֆեսիոնալ կառավարման համակարգ, կոռուպցիա, միգրացիոն հոսք Արցախից, հանրային անվտանգության չիմացություն: Սրանք հարցեր են, որոնք պետք է օր առաջ լուծում ստանան»:
Ելույթից հետո դասախոսները և ուսանողները հանդես են եկել հարցադրումներով, կիսվել մտահոգություններով:
