Արցախի հանրապետական բժշկական կենտրոնի պոլիկլինիկական բաժանմունքում ընթանում է նոր կորոնավիրուսային (COVID-19)-ի դեմ վարակը կանխարգելող ռուսական «Sputnik V»-ի պատվաստանյութով պատվաստման գործընթացը։
Արցախում մեկնարկել են «Sputnik V»-ի պատվաստումները. գործընթացը ներկայացնում են մասնագետները
ՍՏԵՓԱՆԱԿԵՐՏ, 4 մայիսի, ԱՐՑԱԽՊՐԵՍ: Այս մասին «Արցախպրես»-ին թղթակցի հետ զրույցում ԱՀ առողջապահության նախարարության աշխատակազմի պետական հիգիենիկ և հակահամաճարակային տեսչության պետ Օֆելյա Հարությունյանն ասել է, որ ռուս խաղաղապահներն Արցախին տրամադրել են 15000 դեղաչափ պատվաստանյութ, որով կպատվաստվեն 7500 քաղաքացի:
Նրա խոսքով՝ իմունականխարգելման աշխատանքները մեծ դեր են խաղում բնակչության առողջության պահպանման գործում:
«Պատվաստումների իրականացման արդյունքում կունենանք կորոնավիրուսի հետևանքով ծանր հիվանդների նվազում և մահացության դեպքերի բացառում: Առաջին փուլում ընդգրկված են 65 տարեկան և բարձր տարիքի, 16-64 տարեկան խրոնիկ հիվանդություններ ունեցող անձինք, սոցիալական պաշտպանության հաստատությունների բնակիչները և աշխատակիցները, բուժաշխատողները, իսկ երկրորդ փուլում՝ ուսուցիչները, ոստիկանության և այլ պետական համակարգերի աշխատակիցներ: Ցանկացողները նախապես պետք է գրանցվեն Ստեփանակերտի պոլիկլինիկական բաժանմունքում, մանկական հիվանդանոցում»,- մասնավորապես ասել է Օ. Հարությունյանը՝ տեղեկացնելով, որ ապրիլ ամսվա ընթացքում պատվաստում է ստացել 15 քաղաքացի, իսկ մայիսի 4-ի դրությամբ՝ 74:
Նա նշել է, որ, ելնելով իրավիճակից, հետագայում պատվաստումը կարող է պարտադիր դառնալ:
Օ. Հարությունյանը նշել է նաև, որ կորոնավիրուսի պատճառով ներկա պահին ստացիոնար բուժում է ստանում 21 հիվանդ: Ընդհանուր առմամբ, կորոնավիրուսի հետևանքով հանրապետությունում գրացվել է 30 մահվան դեպք:
Հանրապետական բժշկական կենտրոնի գործադիր տնօրեն Մհեր Մուսայելյանի տեղեկացմամբ՝ այսօր արդեն 10 քաղաքացի պատվաստվել է «Sputnik V» պատվաստանյութով:
«Պատվաստումից հետո քաղաքացիները 30 րոպե մնում են հիվանդանոցում, այդ ընթացքում մենք հետևում ենք, որպեսզի նրանց մոտ ի հայտ չգան ալերգիկ ռեակցիա, ջերմություն, ճնշման տատանումներ, որից հետո կարող են հանգիստ տուն գնալ: Որևէ բողոք կամ խնդիր մինչ այժմ չի եղել:
Պատվաստումները կամավոր հիմքով են իրականացվում, բայց քաղաքացիները պետք է իրազեկված լինեն, որ կորոնավիրուսի կանխարգելման դեմ սա լուրջ պատվաստանյութ է: Այն անձինք, ովքեր վարակվել են կորոնավիրուսով պատվաստում կարող են ստանալ միայն 3 ամիս անց: Ի դեպ, պատվաստում կատարելու համար նախապես 3 օր քաղաքացին չպետք է ալկոհոլ օգտագործի: Պատվաստումը կատարվում է երկու դեղաչափով, առաջինը ստանալուց հետո երկրորդը ստանում է 21 օր անց: Այնուհետև քաղաքացիներին տրվում է նոր կորոնավիրուսային վարակի դեմ կանխարգելիչ պատվաստումների հավաստագիր, որում նշվում են «Sputnik V» պատվաստանյութի առաջին և երկրորդ չափաբաժինների ներարկման ժամկետները և անձնական տվյալներ»,- մանրամասնել է Մ. Մուսայելյանը:
Համաճարակաբան Զոյա Մաղաքելյանի խոսքով՝ Արցախի բնակչության գրեթե մեծ մասը վարակվել է կորոնավիրուսով, և այս պատվաստումն այն միջոցն է, որով կկանխարգելվի այդ հիվանդության տարածումը:
«Պատվաստումից 42 օր անց քաղաքացին նոր իմունիտետ է ձեռք բերում, որը մեկ տարի շարունակ չի թողնում վարակվել այդ հիվանդությամբ: Խորհուրդ եմ տալիս բոլորին, որպեսզի պատվաստվեն և չվարակվեն «COVID-19»-ով»,- ավելացրել է Զ. Մաղաքելյանը:
63֊ամյա Ելիզավետա Գերոյանը, ով այսօր պատվաստվել է «Sputnik V» պատվաստանյութով, մեզ հետ զրույցում ասել է, որ նա վարակվել էր կորոնավիրուսով:
Քաղաքացին խորը ուսումնասիրություն է կատարել պատվաստանյութերի վերաբերյալ և որոշել է պատվաստվել «Sputnik V» պատվաստանյութով՝ խուսափելով հիվանդության կրկնումից:
Պատվաստումների ընթացքին հետևել է ԱՀ առողջապահության նախարար Միքայել Հայրիյանը:
