Արցախի պետական համալսարանում այսօր՝ մայիսի 7-ին, կազմակերպվել է Արիության դաս՝ նվիրված մայիսյան եռատոնին:
ԱրՊՀ-ում Արիության դաս է կազմակերպվել
ՍՏԵՓԱՆԱԿԵՐՏ, 7 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱրՊՀ ռեկտոր Արմեն Սարգսյանը: Նրա խոսքով՝ մայիսի 9-ի նախաշեմին շատ կարևոր և անհրաժեշտ է նման հանդիպումների կայացումը: Ա. Սարգսյանը նշել է, որ, չնայած Արցախյան երրորդ պատերազմից հետո այս տարի մայիսի 9-ն այլ կերպ է ընկալվում, սակայն պետք է հաղթահարել բոլոր դժվարությունները և կրկին հաղթանակներ տոնել: «Արցախյան երրորդ պատերազմի ընթացքում Արցախի մայր բուհը տվել է 24 զոհ , ունի 2 անհայտ կորած: Բուհում ստեղծել ենք հուշատախտակ և այս պահին աշխատում ենք «Անկախության նվիրյալները» գրքի հրատարակման ուղղությամբ: Ինչպես նախորդ պատերազմներում, այս անգամ ևս բուհի ուսանողները ակտիվ մասնակցություն ունեցան հայրենիքի պաշտպանության գործում»,- մասնավորապես ասել է Ա. Սարգսյանը:
Միջոցառման ներկաները մեկ րոպե լռությամբ հարգել են Արցախյան պատերազմների ընթացքում անմահացած հերոսների հիշատակը: Արցախի կրթության, գիտության, մշակույթի և սպորտի նախարար Լուսինե Ղարախանյանը նշեց, որ հայ ժողովուրդն ապրում է պատմական ծանր ու դժվար ժամանակներ, սակայն բոլոր կորուստներով ու տառապանքներով հանդերձ հայը պարտավոր է ապրել:
«Համազգային ու պետական գործունեության վերճշտման ժամանակներն ենք ապրում, և այդ վերճշտումներով ու հեռահար ծրագրերով մենք հասնելու ենք նոր վերածննդի: Սա է մեզ պատգամում մեր փառավոր մայիսը: Ես չեմ հրաժարվում մայիսի 9-ից և չեմ ուզում որևէ մեկը հրաժարվի: Մենք ունեցանք մայիսի 9-ը, որովհետև ունեցանք հայ ժողովրդի ուժերի լարում,որն այս անգամ չկար: Հայրենիքի փրկության միահամուռ գիտակցված կամքը կար, կյանքի ու կռվի պատերազմում էլ կար: Մայիսի 9-ին հաղթել ենք, որովհետև ազգովի բանակ էինք դարձել. այն ժամանակ էլ անդառնալի կորուստներ ենք ունեցել , բայց մեզ սփոփել ենք, որովհետև կարողացել ենք պահպանել մեր ինքնությունը և պատմական հայրենիքը: Հիմա էլ կան մարդկային և տարածքային մեծ կորուստներ, բայց մենք պետք է զսպենք այդ կորստի ցավը մեր մեջ և առաջ գնանք: Հայ միտքն ու ոգին՝ կորստի ու պարտության ցավը զսպած , պիտի գնան անձնական և ազգային ինքնահաղթահարման: Պետք է դուրս գանք «ես»-ի մասնավորի նկրտումների սահմաններից և գնանք «մենք»-ի, որը կլինի մեր փրկության միակ ճանապարհը: Մենք դատապարտված ենք ապրելու բարբարոս կեցվածք ունեցող, մեկդարյա պատմություն ունեցող, բայց քաղաքակրթական արժեքները ոչնչացնող և նենգափոխող ադրբեջանցիների կողքին: Արցախի մոտ 2000 հուշարձաններ գտնվում են թշնամու կողմից օկուպացված տարածքներում, ինչպես նաև 20.000 թանգարանային նմուշներ: Մենք պետք է դիմակայենք թշնամու հակահայկական և հակաքրիստոնեական պատերազմին»,- մասնավորապես ասել է Լ. Ղարախանյանը:
ԱՀ պաշտպանության բանակի հրամանատարի տեղակալ Նորայր Մկրտչյանն իր ելույթում անդրադարձել է Հայրենական պատերազմում հայ ժողովրդի մասնակցությանը, դերին, նշանակությանը, Շուշիի ազատագրմանը և հայկական բանակի ստեղծմանը:
Անդրադառնալով այս տարվա մայիսի 9-ին՝ Ն. Մկրտչյանն ասել է. «Այս տարի Եռատոնը նշում ենք 44-օրյա պատերազմից հետո ձևավորված նոր իրողությունների պայմաններում: Մայիսի 9-ը շարունակում է մնալ Եռատոն, քանի որ Ադրբեջանի ժամանակավոր վերահսկողությունը Շուշիի նկատմամբ չի նսեմացնում 1992 և 2021 թվականներին պաշտպանության բանակի մարտիկների կատարածի արժեքը: 44-օրյա պատերազմի ընթացքում ԱՀ ՊԲ-ն մարտնչել է, որ ոչ միայն Ադրբեջանի, այլև Թուրքիայի, Պակիստանի և միջազգային ահաբեկչական դաշինքի դեմ, որոնց ռազմատեխնիկական աջակցություն են ցուցաբերել Իսրայելը, Ուկրաինան, Բելառուսիան, Հարավաֆրիկյան հանրապետությունը և այլք: Բոլոր հաշվարկների համաձայն՝ հակառակորդի ռազմատեխնիկական առավելությունն այնքան մեծ էր, որ պատերազմի 5-րդ օրը պետք է կատարած լինեին իրենց խնդիրը: Սակայն նշված ժամանակահատվածում թշնամուն չի հաջողվել արձանագրել նշանակալի հաջողություն: Պատերազմական գործողություններին ներգրավվել են թուրքական բանակի հատուկ նշանակության ստորաբաժանումները: Այս պայմաններում թշնամին կրել է այնքան մեծաթիվ կորուստներ, որ ստիպված է եղել համաձայնվել կրակի դադարեցման ռուսական առաջարկին: Նրա կենդանի ուժի կորուստը համեստ հաշվարկներով գերազանցում է 20.000-ը: Ինչպես մեր հերոսական նախնիները, այնպես էլ մերօրյա մարտիկնեը դիմակայել են թշնամու՝ մինչև ատամները զինված հրոսակախմբերին: Ծավալվել են արյունահեղ մարտեր ամեն մի թիզ հողի համար: Թշնամին չէր մտածել, որ մեր մարտիկները կպայքարեն մինչև վերջ»։