Այսօր՝ հունիսի 7-ին, Եզնիկ Մոզյանի անվան արհեստագործական ուսումնարանում տեղի է ունեցել «Բաց դռների» օր:
Եզնիկ Մոզյան արհեստագործական ուսումնարանը «Բաց դռների օր» է կազմակերպել
ՍՏԵՓԱՆԱԿԵՐՏ, 7 հունիսի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ ամեն տարի ԱՀ ԿԳՄՍ նախարարությունը իրականացնում էր "մասնագիտական կողմնորոշում" ծրագիրը, որի նպատակն էր Արցախի մայրաքաղաքի, ինչպես նաև շրջանների դպրոցների 9-րդ դասարանցիներին ծանոթացնել Շուշիի «Եզնիկ Մոզյանի արհեստագործական ուսումնարան» հիմնադրամի գործունեությանը:
«Դժբախտաբար, այս տարի հայտնի պատճառներով ծրագրի իրականացումը հնարավոր չէր, դրա համար մենք որոշեցինք կազմակերպել «Բաց դռների օր» խորագրով միջոցառում, որի նպատակն է իրազեկել արցախցի դպրոցականներին Եզնիկ Մոզյանի անվան արհեստագործական ուսումնարանի նոր հասցեի պայմանների, կրթական ծրագրերի և մասնագիտական աշխատանքների մասին»,- մեզ հետ զրույցում նշել է Եզնիկ Մոզյան արհեստագործական ուսումնարանի տնօրեն Նարինե Իշխանյանը՝ հավելելով, որ հետագայում նախատեսում են շրջանների երեխաների համար կազմակերպել նմանաիպ միջոցառումներ։ Պատերազմից հետո մայրաքաղաքում մեծ թափով շինարարական աշխատանքներ են իրականացնում, և, բնականաբար, զգացվում է մասնագետների կարիք, ինչի արդյունքում էլ սերտանում է Ե.Մոզյանի անվան ուսումնարանի և ԱՀ Քաղաքաշինության նախարարության համագործակցությունը:
«Հաշվի առնելով հետպատերազմյան ժամանակաշրջանը՝ ուսումնարանի հետ ընթացիկ տարում փոխգործակցությունը նոր մոտեցումներով է իրականացվում : Նախարարությունը առաջին հերթին աջակցում է նոր շենքային պայմանների բարելավմանը՝ տրամադրելով որոշակի շինանյութեր, որպեսզի աշակերտների կողմից իրականացվեն հենց իրենց շենքային պայմանների վերանորոգման աշխատանքները»,- մեզ հետ զրույցում նշել է ԱՀ Քաղաքաշինության նախարար Արամ Սարգսյանը՝ հավելելով, որ սաների կողմից մեծ է ներգրավվածությունը որոշ համայնքներում վերանորոգման ու վեռակառուցման աշխատանքներին:Նախարարը հույս հայտնեց, որ որոշ ժամանակ հետո այդ համագործակցությունը ավելի է ընդլայնվելու, և մենք արդեն արձանագրելու ենք նոր մասնագետներ, նոր աշխատուժ ունենալու փաստը:
Վերջին շրջանում՝ պատերազմից հետո, աշակերտների մոտ մեծացել է հետաքրքրությունը դեպի ուսումնարանները՝Շուշիում գործած Եզնիկ Մոզյանի անվան արհեստագործական ուսումնարանը, տեխնոլոգիական համալսարանը, Արսեն Խաչատրյանի անվան հումանիտար քոլեջը:
«Պատերազմից հետո Շուշիի մի շարք ուսումնարաններ տեղափոխել ենք Ստեփանակերտ, և ,բոլորս, գործադրելով մեր ջանքերը, օգնել ենք, որպեսզի վերականգնվի նրանց ուսումնական գործընթացը: Եվ այսօր ասածիս վառ օրինակն է հանդիսանում Շուշիի Եզնիկ Մոզյանի անվան ուսումնարանը: Այսօր ուսումնարանում ինչ որ կա, դա միայն մեր գործընկերների, Հայաստանի հանրապետության ու Ֆրանսիայի հանրապետության գործընկերների օգնությունն է, նաև շատ մեծ ջանքեր է այստեղ գործադրել ուսումնարանի տնօրինությունը՝ ի դեմս տնօրեն Նարինե Իշխանյանի»,- մեզ հետ զրույցում նշել է ԱՀ ԿԳՄՍ նախարարի տեղակալ՝ Հասմիկ Մինասյանը:
Գեորգի Առաքելյանը, ով սովորում է Ստեփանակերտի Գրիբոյեդովի անվան թիվ 3 դպրոցում, համադասարանցիների հետ միասին այսօր մասնակցել է «Բաց դռների օր» խորագրով միջոցառմանը: «Ուսումնարանը ինձ և իմ հադասարանցիներին շատ է դուր եկել,մենք հույս ունենք որ երեք տարի անց մենք էլ կհաճախենք այս ուսումնարան»,֊նշել է նա:
Ե. Մոզյանի անվան ուսումնարանի աշկերտները ևս մասնակցել են Արցախյան 3-րդ պատերազմին: Դժբախտաբար, նրանցից տասը անմահացել են հայրենիքի համար մղվող սուրբ պայքարում: Ի հիշատակ նրանց՝ մայիսին ուսումնարանում տեղի է ունեցել հուշատախտակի բացման արարողություն:
