ՍՏԵՓԱՆԱԿԵՐՏ, 8 հունիսի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ միջոցառմանը ԱՀ կրթության, գիտության, մշակույթի և սպորտի նախարարի տեղակալ Գայանե Գրիգորյանը առանձնանշեց , որ տաղանդավոր երեխաներ ունենք, պարզապես նրանց անհրաժեշտ է առաջին հերթին խաղաղություն:

«Բոլոր կատարումները վկայում են այն մասին, որ նրանք ուզում են սովորել, զարգանալ, նրանք ապրում են մշակույթով, ինչը շատ ուրախալի է»,- ասաց նա։

Դպրոցի շրջանավարտ Դավիթ Իսրայելյանը ցանկանում է երաժշտական դպրոցն ավարտելուց հետո ընդունվել երաժշտական քոլեջ, իսկ հետո կոնսերավատորիա և դառնալ պրոֆեսիոնալ երաժիշտ:

 

«Ես իմ արվեստով կշենացնեմ հայրենիքս։ Համոզված եմ, որ յուրաքանչյուրի նման մոտեցումը Արցախն ավելի լավը կդարձնի»,- համոզմունք հայտնեց շրջանավարտը։

Թառի դասատու Լևոն Սարդարյանի խոսքով՝ ժողովրդական գործիքները բոլոր ժամանակներում գրավիչ են, բայց պետք է դրանք հանրահռչակվեն, որպեսզի հասարակությունը սիրի, ընդունի և շարունակի այդ ավանդույթները:

 

«Տասնյակ տարիների ընթացքում դպրոցը հազարավոր մանուկներ է ընդունել իր հարկի տակ և նույնքան էլ շրջանավարտ ունեցել։ Թեև հետպատերազմյան ժամանակաշրջանն իր ազդեցությունն է թողել, բայց նկատելի է երիտասարդների ձգտումը դեպի հայկական ժողովրդական արվեստը, և դա հուսադրող է»,- մեզ հետ զրույցում ընդգծեց Լ. Սարդարյանը:

Երաժշտական դպրոցի տնօրեն Արթուր Պետրոսյանը հիշում է՝ ամիսներ առաջ դպրոցն ավերված էր։

 

«Ես մենակ էի դպրոցում, իսկ այսօր դահլիճը լեփ-լեցուն է, ուստի այսօրվա միջոցառման կայացումը համարում եմ մեծ հաջողություն: Իսկ դպրոցի սաների կատարումները հաստատում են, որ մեր երկրի մշակույթի ապագան խոստումնալից է ու լուսավոր»,- նշեց Ա. Պետրոսյանը։

 

Ստեփանակերտի քաղաքապետարանի աշխատակազմի մշակույթի, երիտասարդության հարցերի և զբոսաշրջության բաժնի պետ Կարինե Հարությունյանը երաժշտական դպրոցի՝ միջոցառումներին ակտիվություն ցուցաբերած սաներին պատվոգրեր է հանձնել:

 

Դպրոցի տնօրինությունը նույնպես պատվոգրերով և հուշանվերներով պարգևատրել է մասնակիցներին: Համերգից հետո դպրոցն ավարտած սաներին տրվեցին շրջանավարտների վկայականներ։