Նախօրեին Ստեփանակերտի Մշակույթի և երիտասարդության պալատում տեղի է ունեցել Հակոբ Գյուրջյանի անվան արվեստի դպրոցի սաների հաշվետու համերգը:
Ստեփանակերտում կայացել է արվեստի դպրոցի սաների հաշվետու համերգը
ՍՏԵՓԱՆԱԿԵՐՏ, հունիսի 18, ԱՐՑԱԽՊՐԵՍ։ Համերգի ընթացքում երաժշտական տարբեր համարներով և պարերով հանդես են եկել արվեստի դպրոցի բոլոր դասարանների աշակերտները:
«Եթե ինձ համերգից հետո մեկը պատահի ու հարցնի, թե ինչ կա, ես կասեմ՝ մենք կանք: Մենք աշխարհին ամենաշատ մշակութային արժեքներ տված ազգն ենք՝ չնայած աշխարհը դա չի գնահատում: Մենք կշարունակենք ապրել, արարել ու ներկայացնել մեր մշակույթը ամբողջ աշխարհին»,- մեզ հետ զրույցում նշել է ԱՀ ԿԳՄՍ նախարար Լուսինե Ղարախանյանը:
Արվեստի դպրոցի տնօրեն Էվելինա Լալայանի խոսքով՝ համերգին ներկայացվեցին տաղանդավոր երեխաների կատարումներ ։ «Քանի որ ներկայացված էին հայկական երգեր ու պարեր, մենք դրանով նպատակ ունեինք ի լուր աշխարհի ասել, որ մենք կանք, կլինենք ու կշարունակենք ստեղծագործել: Մեր երեխաները արժանի են ապրել ուրախ, խաղաղ երկնքի տակ, ոչ ոք իրավունք չունի նրանցից խլել մանկությունը»,- նշեց Է. Լալայանը։
Համերգի վերջում երաժշտական համերգով հանդես են եկել նաև ռուս խաղաղապահները:
